ДЕБРЕЦЕН МЭРІ ШАҺАР ТӨРІНДЕ

Шаһарымыз Венгрияның Дебрецен қаласымен алғаш рет бауырластық байланыс орнатты. Дәлірек айтсақ, екі қала арасындағы іскерлік байланысты бекемдеу мақсатында 60-тан астам жергілікті және шетелдік кәсіпорын өкілі бизнес-форумда бас қосты. Бұған дейін тек сырттай таныс болған қалалар енді етене араласып, әріптестікті арттырмақ.

Шымкентке Венгрияның Дебрецен қаласының мэрі арнайы ат басын бұрып, ресми сапармен келді. Сапардың өзекті тұсы – қос шаһардың бауырластық байланысын бекемдейтін меморандумға қол қойылуы болды. Қалай десек те, бұл уағдаластық енді екі қала арасындағы сауда-саттық, инвестиция, мәдениет және өзге де салалардағы байланысты өрістетуге жол ашпақ.

60-тан астам жергілікті және шетелдік кәсіпорын өкілі бас қосқан жиынға Венгриядан 14-ке жуық делегация келді. Оның 10-ға жуығы – бизнес өкілдері. Яғни қос шаһар арасындағы бауырластықты енді кәсіпкерлік байланыс бекемдей түспек.

Бүгінде мегаполистің өнеркәсіп саласында 900-ден астам кәсіпорын жұмыс істейді. Соның 20-сы – ірі, 40-ы – орта, қалғаны шағын өндіріс орындары. Ал былтырғы жылдың қорытындысы бойынша шаһарға 859 миллиард теңге инвестиция тартылған. Кәсіпорын басқармасы басшысының айтуынша, биыл бұл бағыттағы көрсеткіш 3 пайызға өскен. Айта кетерлігі, аталған өсімді ағымдағы жылы 10 пайызға жеткізу жоспарланған.

Алқалы басқосуда тараптар өзара тәжірибе алмасып, сауда-саттық пен инвестицияға жол ашатын жаңа әріптестік бағыттарды талқылады. Соның ішінде «Оңтүстік» арнайы экономикалық аймағында орналасқан, кеңсеге арналған А4 және А3 форматындағы ксерографиялық қағаз өндіретін компания өкілдері де жаңа мүмкіндіктерден үмітті. Әсте, жиынға жиналған кәсіпкерлер венгриялық әріптестермен тәжірибе алмасып, өзара тиімді байланысты жолға қоюға ниетті.