Шымкентте Ұстаздар күніне орай ұлағат иелеріне құрмет көрсетілді. Салтанатты шараға екі мыңға жуық адам қатысып, білім саласының үздіктері мен ардагерлері бас қосты. Аталған жиында шәкірт тәрбиелеуге ғұмырын арнаған бірқатар педагогтің еңбегі еленіп, қала әкімінің қолынан марапаттар табысталды.
Салтанатты іс-шара «Ұстаз – ұлы тұлға, ұстаздық – ұлы міндет» тақырыбын арқау етті.
Жиында мегаполис әкімі сөз сөйлеп, өскелең ұрпақты тәрбиелеу мен елдің дамуына ұстаздардың қосып отырған үлесіне тоқталды. Ал қаладағы басты міндеттердің бірі – мұғалімдердің сапалы жұмыс істеуіне және балалардың лайықты білім алуына жағдай жасау екенін атап өтті.
Іс-шара барысында білім саласының дамуына өзіндік үлес қосқан үздіктердің еңбегі еленді. Заманауи педагогикалық тәсілдерді шебер меңгеріп, кәсіби қызметінде толымды нәтижеге жеткен, озық тәжірибесімен дараланған бірқатар ұстазға қала әкімі арнайы марапаттар табыстады.
№89 мектеп-лицейінің қазақ тілі мен әдебиеті пәнінің мұғалімі, филология ғылымдарының кандидаты Айткүл Бейсенбайқызы марапаттау рәсімінде алғашқылардың бірі болып сахна төрінен көрінді. Ұстаз қала әкімінің қолынан «Құрмет» орденін алып, қуанышын бөлісті. Сондай-ақ барша әріптестерін кәсіби мерекемен құттықтады.
