Шымкентке мәскеуден арнайы дәрігерлер келді. Олар онкологиялық «Асқазан-ішек жолы мен кіші жамбас ағзаларының заманауи аз инвазивті онкохирургиясы» тақырыбында халықаралық шеберлік сабағын өткізді.
Мәскеуден келген тәжірибелі хирург дәрігерлер күрделі оталарды көрсетіп, заманауи емдеу әдістері бойынша тәжірибелерімен бөлісті.
Шеберлік сабағы хирургтер, онкологтар, урологтар, гинекологтар және резидент дәрігерлердің басын қосты. Бағдарлама аясында аз инвазивті тәсілмен орындалатын бірнеше күрделі онкологиялық операция тікелей көрсетілді. Мамандар әрбір клиникалық жағдайды жан-жақты талдап, емдеу тактикасын бірге саралады. Қатысушылар тәжірибелі хирургтің жұмыс барысын бақылап, жаңа әдістерді меңгеруге мүмкіндік алды.
Шеберлік сабағының сарапшысы – Мәскеудегі «Фомина» клиникалар желісінің бас хирургі Александр Жаугашев. Ол аз инвазивті онкохирургия бүгінде қатерлі ісіктерді емдеудегі ең тиімді бағыттардың бірі екенін атап өтті. Оның айтуынша, Шымкент қалалық онкологиялық орталығы қажетті заманауи құрал-жабдықтармен толық қамтамасыз етілген. Сондықтан мұнда халықаралық стандартқа сай күрделі операцияларды жасауға барлық мүмкіндік бар. Бұл өз кезегінде пациенттердің сапалы әрі қолжетімді ем алуына жағдай жасайды.
Шеберлік сабағы барысында ұйқыбездің денесі мен құйрығын резекциялау және басқа да күрделі операциялар көрсетілді. Дәрігерлер ота жасау кезіндегі заманауи технологиялардың артықшылықтарын тәжірибе жүзінде көрді. Аз инвазивті әдістер науқастың тезірек сауығып, ауруханада жату уақытын қысқартуға мүмкіндік береді. Халықаралық тәжірибені енгізу – отандық онкологиялық қызметтің сапасын арттырудағы маңызды қадам.
Соңғы екі күнде Шымкент қалалық онкологиялық орталығында заманауи аз инвазивті әдіспен бірқатар күрделі онкологиялық операциялар жасалды. Дәрігерлер асқазан, қуық, жатыр мойны, ішек және ұйқыбез обырына ота жасап, барлық операцияларды үлкен тіліксіз, шағын тесіктер арқылы орындады. Мамандардың айтуынша, мұндай жоғары технологиялы хирургияны орталыққа кеңінен енгізу жоспарланып отыр. Мұндағы операциялық бөлмелер заманауи талаптарға толық сай жабдықталған. Интеграцияланған жүйенің арқасында жасалып жатқан операцияларды Қазақстанның түкпір-түкпіріндегі хирургтер онлайн режимде көріп, тәжірибе алмаса алады. Қажет болса, оталарды әлемнің кез келген еліне де тікелей көрсетуге мүмкіндік бар. Сонымен қатар, хирургиялық құрал-жабдықтар толық қамтылған, операция жасауға барлық жағдай жасалған. Операция ісікті алып тастауға мүмкіндік береді, бірақ онкологиялық емнің бір ғана кезеңі болып саналады. Науқастардың көпшілігі отаға дейін немесе кейін міндетті түрде химиотерапия алады. Аз инвазивті хирургияның басты артықшылығы – науқастың тез оңалып, емнің келесі кезеңіне, яғни химиотерапияға уақытылы көшуіне жағдай жасау. Сондықтан хирургтер ота кезеңін асқынусыз өткізіп, пациенттің толыққанды ем алуына мүмкіндік беруі өте маңызды.
