Шымкентте Мемлекет басшысы Қасым-Жомарт Тоқаевтың қоршаған ортаны қорғау, елді мекендердің тазалығы мен көркеюін қамтамасыз ету жөніндегі тапсырмаларын іске асыру аясында «Таза Қазақстан» республикалық бағдарламасы бойынша кезекті акция өтті. Игі бастама қала тазалығын сақтауға, тарихи-мәдени мұра нысандарына құрметпен қарауға және вандализмнің алдын алуға бағытталды.
Акция барысында еріктілер Бауыржан Момышұлы ескерткішінің айналасын тазалап, қоғамдық кеңістіктің көркін жақсартуға үлес қосты. Шараға 15 жас қатысты. Алдағы уақытта осындай жұмыстар Абай Құнанбайұлы ескерткішінің аумағында жалғаспақ.
Мемлекет басшысы Қасым-Жомарт Тоқаев «Таза Қазақстан» бастамасының маңызын атап өтіп, тазалықты сақтау мен қоршаған ортаға жанашырлықпен қарау қоғамның күнделікті дағдысына айналуы қажеттігін үнемі айтып келеді. Бұл ретте бағдарламаның негізгі мақсаты – көшелер мен қоғамдық орындарды тазалаумен ғана шектелмей, азаматтардың экологиялық мәдениетін көтеру, өскелең ұрпақтың бойында табиғатқа деген жауапкершілікті қалыптастыру және қоғамдық мүлікке құрметпен қарауды орнықтыру.
Шымкентте ұйымдастырылып жатқан тазалық акциялары осы міндеттерді жүзеге асыруға бағытталған. Әсіресе, тарихи тұлғалардың ескерткіштерін күтіп ұстау мен оларды бүлдіру әрекеттерінің алдын алу жұмыстарына айрықша мән берілуде. Өйткені ескерткіштер – ел тарихын, ұлттық рух пен ұрпақтар сабақтастығын танытатын құнды мұра. Оларды қорғау – тарихи жадыны сақтау мен ұлттық құндылықтарды құрметтеудің маңызды көрінісі.
Жыл басынан бері қалада «Таза Қазақстан» бағдарламасы аясында 64 іс-шара ұйымдастырылған. Оған жастар мен еріктілердің белсенді қатысуы қоғамдық бастамалардың ауқымын кеңейтіп, азаматтық жауапкершілікті арттыруға ықпал етіп отыр. Мұндай шаралар жас буынды еңбекке, тазалыққа және туған қаласына жанашырлықпен қарауға тәрбиелейді.
Жастар ресурстық орталығының маманы, ерікті Жазира Омарованың айтуынша, мұндай бастамалардың тәрбиелік мәні зор.
«Бұл акциялардың қала үшін маңызы ерекше. Олар тазалықты сақтаумен қатар, жастардың бойында қоршаған ортаға және тарихи мұраға деген жауапкершілікті қалыптастырады. Қуантатыны – игі іске атсалысатын жастардың қатары көбейіп келеді. Олар өз ісімен әрбір азаматтың қала көркіне үлес қоса алатынын көрсетуде. Мұндай бастамалар жастарды ортақ мақсатқа жұмылдырып, тұрғындарды қоғамдық орындарға ұқыпты қарауға жетелейді деп сенеміз», – дейді ол.
Ұйымдастырушылардың мәліметінше, қаланы абаттандыру, қоғамдық орындардың тазалығын сақтау және тарихи ескерткіштерді қорғау бағытындағы жұмыстар жыл соңына дейін жалғасады. Бұл шаралар тұрғындардың экологиялық сауатын арттырып, қоғамдық ортаға деген жауапкершілігін нығайтуға мүмкіндік береді.
Тазалық – бір реттік науқан емес, тұрақты ұстаным болуы тиіс. Мемлекет басшысы көтерген «Таза Қазақстан» бастамасының түпкі мәні де осында. Қала тазалығын сақтау, тарихи мұраны қорғау және қоғамдық тәртіпке құрметпен қарау әрбір азаматтың күнделікті дағдысына айналғанда ғана көздеген мақсатқа қол жеткізуге болады. Ал туған жердің көркеюіне үлес қосу – елге деген сүйіспеншіліктің нақты көрінісі.
