Шымкентте Отан алдындағы борышын абыроймен өтеп келген 27 сарбазды салтанатты қарсы алу рәсімі өтті. Бір жыл бұрын шаһардағы теміржол вокзалынан Теміртау қаласына аттанған жас жауынгерлер туған жерге оралып, жақындарымен қауышты. Сап түзеп, әскери тәртіпке шыңдалған сарбаздар енді ел дамуына үлес қосуға дайын.
Мерзімді әскери қызметін аяқтап, елге оралған 27 сарбазды теміржол вокзалында ата-аналары, жақындары және әскери қызметшілер салтанатты түрде қарсы алды. Іс-шара қалалық қорғаныс істері жөніндегі департамент пен «Оңтүстік» өңірлік қолбасшылығына қарасты 35748 әскери бөлімінің оркестрінің ұйымдастыруымен өтті.
Осыдан бір жыл бұрын 27 жас сарбаз Теміртау қаласына Отан алдындағы борышын өтеуге аттанған болатын. Бүгінде олар әскери қызметін аяқтап, туған қаласына аман-есен оралды. Олардың қатарында Оңтүстік Қазақстан гуманитарлық-экономикалық колледжінде бірге оқыған тоғыз топтас та бар.
Бірге әскерге аттанған жас сарбаздар бүгінде тәртіп пен жауапкершілікті бойына сіңірген, бір үйдің баласындай бауыр басқан азаматтарға айналған. Салтанатты шара барысында қорғаныс істері жөніндегі департамент өкілдері мен Қарулы Күштердің ардагерлері сөз сөйлеп, ата-аналарға ел қорғайтын ұл тәрбиелегені үшін алғыс айтты. Сондай-ақ, әскери қызметін абыроймен аяқтаған сарбаздарға ризашылықтарын білдіріп, олардың Отан алдындағы борышын адал атқарғанын атап өтті.
Шымкент қаласы қорғаныс істері жөніндегі департаментінің бастығы, полковник Әбдіғабит Шегебаевтың айтуынша, мерзімді әскери қызметшілерге мемлекет тарапынан бірқатар әлеуметтік қолдау шаралары қарастырылған. Атап айтқанда, несиесі бар сарбаздардың төлемдері әскери қызмет кезеңінде уақытша кейінге шегеріледі. Сонымен қатар, әскери борышын өтеген жастар мемлекеттік білім гранттары конкурсына қатысып, жоғары оқу орындарында тегін білім алу мүмкіндігіне ие болады.
Жас сарбаздардың айтуынша, бір жыл ішінде олар әскери істің қыр-сырын меңгеріп, түрлі оқу-жаттығуларға қатысып, тәртіп пен жауапкершілікті бойына сіңірген.
Ал туған жерге оралған сәт сарбаздар үшін ерекше әрі толқынысқа толы болды. Перронда гүл мен шар ұстаған ата-аналарының сағынышқа толы құшағы мен қуаныштан төгілген көз жасы бұл кездесуді әсерлі де ұмытылмас сәтке айналдырды.
