ТОҒЫЗҚҰМАЛАҚТАН ҚАЗАҚСТАН ЧЕМПИОНАТЫ БАСТАЛДЫ

 Шымкентте алғаш рет тоғызқұмалақтан Қазақстан чемпионаты басталды. Республика күніне орай ұйымдастырылған додаға еліміздің 17 облысы мен 3 қаласынан 60-қа жуық спортшы жиналды. Алты күнге созылатын бәсекеде 20 үздік ойыншы анықталып, келер жылғы Азия чемпионатына жолдама алады.Ұлттық зияткерлік ойынды ұлықтаған чемпионаттың ашылу салтанатына тоғызқұмалақ шеберлері, жаттықтырушылар мен спорт саласының өкілдері қатысты. Жарыстың Республика күні қарсаңында өтуі де айрықша мәнге ие. Себебі тоғызқұмалақ – халқымыздың ғасырлар бойы қалыптасқан ойлау мәдениеті мен зияткерлік мұрасын дәріптейтін ұлттық ойын. Ал бұл дода спортшыларға өз шеберлігін көрсетіп қана қоймай, халықаралық деңгейдегі жарыстарға жолдама алуға мүмкіндік береді.

Чемпионатқа еліміздің тәжірибелі спортшылары да қатысуда. Солардың бірі – Биғали Зкрияев. Астана қаласының намысын қорғап келген тоғызқұмалақшы 2024 жылы өткен Дүниежүзілік көшпенділер ойындарында жеңімпаз атанған. Сондай-ақ ол Президенттің қолынан екі мәрте марапат алған. Енді тәжірибелі спортшы ел чемпионатында өз мүмкіндігін тағы бір мәрте дәлелдеуге ниетті. Жалпы бәсеке үш бағдарлама бойынша өтеді. Олар – классика, рапид және блиц. Әр бағыттың өз ерекшелігі бар. Классикада ойыншыларға терең ойлануға көбірек уақыт берілсе, рапид пен блицте жылдам шешім қабылдау мен уақытты тиімді пайдалану маңызды. Сондықтан қатысушылардан есепке жүйріктікпен қатар, тактикалық шеберлік пен жоғары зейін талап етіледі.Айта кетейік Шымкентте тоғызқұмалаққа қызығушылық артып келеді. Әсіресе жас буын арасында ұлттық ойынның танымалдығын арттыруға басымдық берілген. Түрлі турнирлер мен жарыстар жас ойыншылардың тәжірибе жинауына, қабілетін шыңдауына жол ашуда. Жалпы чемпионат – 2026 жылғы рейтингтік маусымның қорытынды жарысы. Мұнда көрсетілген нәтиже спортшылардың жылдық рейтингіне әсер етіп, маусымның үздіктерін анықтауға негіз болады. Алты күн бойы жалғасатын тартысты ойындар қорытындысында ел чемпиондары мен жылдың үздік тоғызқұмалақшысыда белгілі болады. Осылайша, ұлттық ойынның үздіктері анықталып, алдағы халықаралық жарыстарға дайындықтың жаңа кезеңі басталмақ.