Бір отбасы баспана алу бақытын жеті жыл армандаса, енді бірі кезекті он бір жыл күтті. Шымкенттік 30 отбасы көптен күткен жаңа пәтердің кілтін алып, қуанышқа кенелді. Бозарық пен Асар-2 шағынаудандарындағы тұрғын үйлер сатып алу құқығымен жалға берілді. Бүгінгі қуаныштың артында талай жылғы күту мен үміт жатыр. Жаңа пәтердің кілтін алған тұрғындардың бірі баспана кезегінде жеті жыл тұрғанын айтады. Ол өз сөзінде қала әкімдігіне алғысын жеткізді. Ал тағы бір тұрғынның бұл күнді күткеніне он бір жыл болған. Қуаныштан жүздері бал-бұл жанған азаматтар жаңа үйге қол жеткізу өздері үшін үлкен белес екенін жеткізді. Енді олар үшін жаңа мекенжай жаңа өмірдің бастауы. Қалада халықты баспанамен қамту жұмыстары кезең-кезеңімен жалғасып келеді.
Жыл басынан бері 3 876 пәтер тұрғындарға табысталған. Ал жыл соңына дейін тағы 4 мыңнан астам пәтер беру жоспарланып отыр. Тұрғын үй кезегінде тұрған азаматтарды баспанамен қамтуда әлеуметтік санаттарға басымдық беріледі. Бұл жолғы пәтерлер де мүгедектігі бар азаматтарға, ерекше балаларды тәрбиелеп отырған және көпбалалы отбасыларға, жетім балаларға, сондай-ақ басқа да санаттағы тұрғындарға берілді. Баспана кейде тек төрт қабырға емес, адам өміріндегі жаңа кезеңнің бастауы. Шаһар тұрғындарын баспанамен қамту жұмыстары алдағы уақытта да жалғасын таппақ.
