ҮЗДІК ОТБАСЫ АНЫҚТАЛДЫ

Шымкентте өнегесімен көпке үлгі болған жанұялар марапатталды. «Мерейлі отбасы – 2026» ұлттық байқауына қатысқан 12 әулеттің ішінен үздігі анықталып, жеңімпаз отбасы республикалық кезеңде қала намысын қорғайды. Бас жүлдеге ие болған Қожамжаровтар отбасы 1 миллион теңге сертификатын иеленіп, Астанада өтетін ұлттық байқауға жолдама алды. Берекесі мен бірлігі жарасқан, ұрпағына өнеге бола білген жанұялар салтанатты түрде марапатталды. «Мерейлі отбасы» ұлттық байқауы – қоғамдағы адамгершілік, еңбекқорлық және ұлттық құндылықтарды дәріптейтін ең беделді отбасылық жобалардың бірі. Биыл Шымкент қалалық кезеңіне 12 жанұя қатысып, әрқайсысы өз әулетінің тарихын, қоғамдық қызметін және жетістіктерін жан-жақты таныстырды. Байқау бір күндік таныстырумен шектелген жоқ. Қатысушылар бірнеше кезең бойынша бағаланған. Әр отбасы өз жетістіктерін диплом, марапат, алғыс хаттар секілді ресми құжаттармен дәлелдеп, отбасының өмірі мен құндылықтарын бейнелейтін арнайы бейнеролик ұсынды. Осы материалдардың негізінде арнайы құрылған комиссия жеңімпазды анықтады. Комиссия құрамына қоғам қайраткерлері, ардагерлер, зиялы қауым өкілдері мен түрлі сала мамандары енді. Бағалау кезінде отбасының қоғамдық белсенділігі, бала тәрбиесі, еңбек жолы, шығармашылық және ұлттық салт-дәстүрді насихаттауы басты назарға алынған.  Нәтижесінде Қожамжаровтар отбасы бас жүлдені жеңіп алып, 1 миллион теңге көлеміндегі сертификатқа ие болды. Ал байқауға қатысқан қалған 11 отбасының барлығы арнайы ынталандыру сыйлықтарымен марапатталды. Жалпы жүлде қорына қалалық бюджеттен 2 миллион 900 мың теңге бөлінген. Енді жеңімпаз жанұя Шымкент қаласының атынан Астанада өтетін республикалық кезеңге қатысады. Бас қаладағы байқауға бару, қайту және іссапар шығындарын толықтай қала әкімдігі қаржыландырады. «Мерейлі отбасы» байқауы жыл сайын қоғамға үлгі болатын жанұяларды ұлықтап, отбасы институтының мәртебесін арттыруға бағытталған. Ал биылғы жеңімпаз Қожамжаровтар отбасы енді Шымкенттің мерейін республикалық деңгейде асқақтатуға мүмкіндік алды.