Семей ядролық сынақ полигонының жабылғанына — 35 жыл. Алайда 456 рет жасалған ядролық сынақтың ізі әлі ұмытылған жоқ. Бір кездері қазақ даласында сыналған ядролық қарулардың жиынтық қуаты Хиросимаға тасталған атом бомбасынан мыңдаған есе асып түсті. Бүгін сол зұлматтың құрбандарын көзбен көргендер еске алды. 1949 жылдан 1989 жылға дейін Семей даласында 456 рет ядролық қару сыналды. Оның 116-сы ашық түрде — жер үстінде және әуеде жүргізілді. Ал қалғаны жер астында жарылды. Бірақ сынақтың астында қалған тек жер қойнауы емес еді. Оның зардабы талай отбасының тағдырына әсер етті.
Шара барысында Семей ядролық сынақ полигонындағы апаттан зардап шеккендерді еске алып, бір минуттық үнсіздік жариялады. Сондай-ақ қаза болғандардың рухына Құран бағышталды. Бүгінде полигон ардагерлеріне ай сайын көмек көрсетіледі. Ал полигон жабылғанына 35 жыл толуына орай оларға екі аптаға шипажайға жолдама беріп, шамамен 200 мың теңге көлемінде сыйақы табысталған.
Сол оқиғаны көзімен көргендердің бірі — Әзімхан Абдуаитов. Бүгінде бір аяғынан айырылған азамат ядролық сынақтардың салдарын орны толмас қайғы-қасірет деп бағалайды. Оның айтуынша, көз алдында өткен сол бір сұмдықты ұмыту мүмкін емес.
