Наурыздың қайта оралуы, қасиетті Тайқазанның Түркістанға қайтарылуы, Алаш арыстарының ақталуы… Қазақ руханиятындағы осы тарихи оқиғалардың бәрі Өзбекәлі Жәнібековтің есімімен тығыз байланысты. 28 тамыз — қазақ мәдениеті мен руханиятының жанашыры, көрнекті мемлекет және қоғам қайраткері, этнограф-ғалым Өзбекәлі Жәнібековтің туғанына 95 жыл. Айтулы датаға орай Шымкентте тұлға ескерткішіне гүл шоқтары қойылып, оның ұлт алдындағы өлшеусіз еңбегі ұлықталды. Салтанатты шараға қоғам қайраткерлері, ғалымдар, ұстаздар мен Өзбекәлі Жәнібеков атындағы Оңтүстік Қазақстан педагогикалық университетінің қызметкерлері қатысты. Ескерткіш алдына жиналған көпшілік ұлт руханияты үшін өлшеусіз еңбек еткен тұлғаның рухына тағзым жасап, гүл шоқтарын қойды. Шара барысында қайраткердің ел тарихындағы орны мен оның тәуелсіз Қазақстанның мәдени келбетін қалыптастырудағы рөлі ерекше сөз болды.
Тағзым рәсімі ғылыми-танымдық семинармен жалғасты. «Өзбекәлі Жәнібеков – ұлт руханиятын жаңғыртқан тұлға» тақырыбында өткен жиынға еліміздің тарихшы және этнограф ғалымдары, мәдениет саласының мамандары жиналды. Басқосуда қайраткердің ғылыми еңбектері, мемлекеттік қызметтегі батыл бастамалары және ұлттық құндылықтарды дәріптеудегі ұстанымы кеңінен талқыланды. Өзбекәлі Жәнібеков – кеңестік идеология ұлттық құндылықтарды шектеген кезеңде қазақтың төл мәдениетін сақтап қалуға бар ғұмырын арнаған қайсар тұлға. Ол ұмыт бола бастаған салт-дәстүрлерді қайта жаңғыртып, тарихи ескерткіштер мен мәдени мұралардың сақталуына тікелей ықпал етті. 1988 жылы алпыс жылдан астам уақыт тойланбаған Наурыз мерекесінің қайта оралуына мұрындық болды. Ал 1989 жылы Санкт-Петербургтегі Эрмитажда жарты ғасыр сақталған Қожа Ахмет Ясауи кесенесінің қасиетті Тайқазанын туған жері – Түркістанға қайтарды. Өзбекәлі Жәнібековтің 95 жылдығына арналған бұл шара – өткенді еске алу ғана емес, ұлттық руханиятқа қызмет етудің жарқын үлгісін кейінгі ұрпаққа насихаттау. Себебі оның қайраткерлігі арқасында қайта жаңғырған тарихи мұралар мен ұлттық құндылықтар бүгінде тәуелсіз Қазақстанның рухани қазынасына айналып отыр.
