Шымкентте Құрылтай сайлауы өзгеше көңіл-күймен өтті. Азаматтық таңдауын жасауға келген тұрғындардың арасында ұлттық нақыштағы және ерекше киім үлгілерімен көпшіліктің назарын аударғандар да болды. Ел бойынша сайлауға 9 миллионнан астам азамат қатысса, үшінші мегаполисте тұрғындардың 75,42 пайызы дауыс берді. Айта кетейік шаһарда барлығы 365 сайлау учаскесі жұмыс істеді.Таңмен таласа айтылған әнұран, сайлау учаскелеріне ағылған жұрт. Бұл — ел өміріндегі жауапты кезеңнің көрінісі. Қала әкімі Ғабит Сыздықбеков орынбасарларымен бірге №231 сайлау учаскесінде дауыс беріп, ел болашағын айқындайтын маңызды науқанға өз үлесін қосты.
39 жылдан бері қолөнермен айналысып келе жатқан Бейісбековтер әулеті үшін ата кәсіп — төрт ұрпаққа жалғасқан дәстүр. Бүгінде үлкен әулеттің 18 мүшесі ұлттық өнерді дәріптеп, осы кәсіппен айналысады. Дәстүрлі қолөнерді ұрпақтан-ұрпаққа жалғап келе жатқан суретшілер отбасы бүгін №1 сайлау учаскесіне келіп, өз таңдауын жасады. Қолөнерді ата кәсіпке айналдырған әулет үшін бұл — дәстүр сабақтастығымен қатар, қоғамдық өмірге белсенді араласудың да бір көрінісі.
«Мерейлі отбасы – 2026» байқауының жеңімпазы атанған Қожамжаровтар әулеті де Құрылтай сайлауында өз таңдауын жасады. Білім мен ғылымды басты құндылық санайтын отбасының 10 мүшесі түгелдей №285 сайлау учаскесіне келіп, азаматтық белсенділіктерін танытты.
Ел өміріндегі маңызды науқаннан аға буын да шет қалған жоқ. Ардагерлер кеңесінің мүшелері №4 сайлау учаскесіне келіп, өз таңдауларын жасады. Олардың қатарында Асылбек Асқар, Бауыржан Әлтеев, Бекет Тұрғараев пен Гүлмира Оспанова да бар. Аға буын өкілдері үшін бұл — азаматтық ұстанымын білдіріп, ел болашағына деген көзқарасын танытудың тағы бір мүмкіндігі.
Айта кетейік №101 сайлау учаскесінде ерекше көрініс болды. Көпшілікке әйгілі «Өрмекші адам» кейпінде танылған 22 жастағы жас дауыс беріп, өз таңдауын жасады. Ал сайлау учаскесіне жиналған 50 жас өрен ерекше флешмоб ұйымдастырып, сайлау күнінің сәнін келтірді.
Маңызды науқанда өнер иелері мен спортшылар да бой көрсетті. Сидней Олимпиадасының чемпионы, Қазақстанның еңбек сіңірген спорт шебері Ермахан Ибраимов №218 сайлау учаскесінде дауыс беріп, өз таңдауын жасады. Ал Жұмат Шанин атындағы академиялық қазақ драма театрының талантты актрисасы Мөлдір Зияева бұл жолы сахна төрінде емес, №333 сайлау учаскесінде көрінді.
