БАСПАНА БАҚЫТЫНА КЕНЕЛГЕН 30 ОТБАСЫ

 Шымкентте халықты тұрғын үймен қамту бағытындағы жобалар кезең-кезеңімен жүзеге асырылып келеді. Осыған орай қалада тағы 30 отбасы көптен күткен баспаналарына қол жеткізді. Жаңа пәтерлердің кілттерін салтанатты түрде қала әкімі табыстап, қоныс иелерін қуанышты сәтпен құттықтады.

 Жаңа пәтерлердің кілтін табыстау рәсімі көрме орталығында өтті. Баспаналар «Отбасы банк» АҚ-ның «2-10-20» және «5-10-20» жеңілдетілген ипотекалық бағдарламалары аясында берілді. Қоныс иелерінің қатарында көпбалалы отбасылар, мемлекеттік қызметкерлер және әлеуметтік санаттағы азаматтар бар. Баспанаға қол жеткізгендердің бірі – Гүлжаһан Бекболатқызы. Ол тұрғын үй кезегінде алты жыл тұрған. Бүгінде қаланың қарқынды дамып келе жатқан Бозарық шағынауданынан бір бөлмелі пәтердің иесі атанды. Айтуынша, көптен күткен қуанышты сәттің туғанына әлі де сене алар емес. Пәтер кілтін алғандардың арасында бұл күнді ерекше есте сақтайтын тұрғындар да бар. Солардың бірі – жеті баланың анасы Жанар Ермаханбетова. Тұрғынның жаңа баспанаға қол жеткізу бақыты туған күнімен тұспа-тұс келген. Көпбалалы ана бұл қуанышты сәтті 11 жыл бойы күткенін айтып, ризашылығын білдірді. Жалпы, жаңа көпқабатты тұрғын үйлер қаланың қарқынды дамып келе жатқан Бозарық шағынауданында орналасқан. Қоныс иелеріне бір және үш бөлмелі пәтерлер табысталды. Мұндай жобалар тұрғын үй кезегінде тұрған азаматтарды баспанамен қамтамасыз етіп қана қоймай, тұрғын үйдің қолжетімділігін арттыруға, жаңа шағынаудандардың инфрақұрылымын дамытуға және жайлы қалалық орта қалыптастыруға ықпал етеді.