Балалар кардиохирургиясын дамыту бағытында маңызды жоба қолға алынды. Жыл соңына дейін Шымкентте республикалық деңгейдегі аймақтық кардиохирургиялық орталық ашу жоспарланып отыр. Жоба Шымкент қаласы, Қызылорда және Жамбыл облыстарының тұрғындарын қамтып, туа біткен жүрек ақауы бар балаларға сапалы әрі қолжетімді медициналық көмек көрсетуге мүмкіндік береді. Бұл туралы облыстық балалар ауруханасы басшысының стратегиялық даму жөніндегі орынбасары мәлімдеді.
Шымкенттегі облыстық балалар ауруханасы – балаларға мамандандырылған медициналық көмек көрсететін жетекші емдеу мекемелерінің бірі. Аурухана 422 төсек-орынға арналған және 13 бейіндік бөлімшеден тұрады. Мұнда 120-ға жуық білікті дәрігер мен 600-ден астам орта буын медицина қызметкері тәулік бойы қызмет көрсетеді. Аурухана басшысының стратегиялық даму жөніндегі орынбасары Сұлтанғали Маутайұлы медициналық көмектің сапасын арттыру бағытында атқарылып жатқан жұмыстар мен алдағы жоспарларға тоқталды.
Жаңа туған нәрестелерден бастап 18 жасқа дейінгі балаларға сапалы медициналық көмек көрсету – облыстық балалар ауруханасының басты бағыты. Бүгінде аудандық және қалалық ауруханалардан жолдамамен келген науқастарды қабылдайтын мекеме заманауи технологиялармен жабдықталған. Мұнда жоғары технологиялы күрделі оталар сәтті жасалып келеді.
Облыстық балалар ауруханасының нейрохирургия бөлімінде бүгінде жоғары технологиялы күрделі операциялар тұрақты түрде жүргізілуде. Бөлімшенің жетекші мамандарының бірі, 17 жылдық тәжірибесі бар нейрохирург Мұхтар Әбдіқадыров биыл 11–22 мамыр аралығында Қытайдың Шанхай қаласында біліктілігін арттырып қайтқан. Қазіргі таңда бөлімде төрт білікті дәрігер қызмет етеді. Бөлімше 30 төсек-орынға арналған.
Білікті мамандар ата-аналарды балалардың қауіпсіздігіне ерекше мән беруге шақырады. Себебі соңғы уақытта балалар арасында химиялық заттарды абайсызда ішіп қою салдарынан өңештің күйіп қалу жағдайлары азаймай отыр. Дәрігерлердің айтуынша, ауруханаға мұндай диагнозбен аптасына кемінде бір бала түседі. Сондықтан тұрмыстық химиялық заттар мен дәрі-дәрмектерді балалардың қолы жетпейтін жерде сақтау – әрбір ата-ананың басты міндеті.
