Қазір жасанды интеллект тек бір саламен шектелмейді. Ол медицинада диагноз қою мен қызмет көрсету сапасын арттыруға, білім беру жүйесінде оқыту процесін жетілдіруге, тұрғын үй-коммуналдық шаруашылығында қызметтердің тиімділігін арттыруға кеңінен енгізіліп жатыр. Сонымен қатар қала тұрғындарын толғандыратын негізгі мәселелердің бірі – интернет сапасы. Бұл бағытта байланыс инфрақұрылымын жаңарту, қамту аумағын кеңейту және тұрақты интернетпен қамтамасыз ету бойынша жұмыстар жалғасуда. Цифрландыру басқармасының басшысы Мұхит Кемелов бұл өзгерістердің барлығы тұрғындарға қолайлы цифрлық орта қалыптастыруға бағытталғанын айтады.
Цифрлық шешімдердің нақты нәтижесі медицина саласында анық байқалады. Жедел жәрдем қызметкерлері арнайы бейнежетондармен қамтамасыз етілуде. Олар шақырту барысында болған барлық жағдайды тіркеп, медицина қызметкерлерінің құқығын қорғауға, сондай-ақ түрлі даулы мәселелерге әділ баға беруге мүмкіндік береді. Ал тұрғындар жедел жәрдем шақырғаннан кейін Яндекс қосымшасы арқылы медициналық бригаданың нақты қай жерде келе жатқанын онлайн бақылап, келу уақытын алдын ала көре алады. Қала көшелерінде де цифрлық жүйелердің тиімділігі байқалады. Шымкентте 340-тан астам көше қиылысына орнатылған ақылды бағдаршамдар көлік ағынын автоматты түрде саралап, қозғалысқа қарай жұмыс режимін өзгертіп, жолдағы кептелісті азайтуға ықпал етеді.
Алайда цифрлық мүмкіндіктермен бірге жауапкершілік те артады. Сондықтан мамандар цифрлық гигиенаны сақтаудың маңызын ерекше атап өтеді. Жеке мәліметтерді бөгде адамдарға бермеу, күмәнді сілтемелерге өтпеу, алаяқтардың түрлі айласына алданбау – әрбір азамат ұстануы тиіс қарапайым қауіпсіздік ережелері.
