Шымкент қаласының мәслихатына жаңа төраға тағайындалды. Депутаттардың ашық дауыс беру қорытындысы бойынша бұл қызметке Мұрат Жолдықожаев сайланды. Бұған дейін мәслихат төрағасы болған Баһадүр Нарымбетов Қазақстан Республикасының Құрылтайына «Әділет» партиясынан кандидат ретінде тіркелуіне байланысты өз өтінішімен қызметінен босатылды. Бұл кадрлық өзгерістер Шымкент қаласы мәслихатының кезектен тыс отыз жетінші сессиясында жарияланды. Шымкент қаласы мәслихатының кезектен тыс отыз жетінші сессиясы өтті. Жиынға қала әкімі, әкімдік мүшелері және 25 депутат қатысты. Күн тәртібіне төрт мәселе енгізілді. Алғашқы мәселе – кадрлық өзгерістерге байланысты Шымкент қаласы әкімдігі жанындағы Терроризмге қарсы комиссияның дербес құрамын бекіту. Депутаттар ұсынылған құрамды бірауыздан қолдап, тиісті шешім қабылдады. Күн тәртібіндегі екінші мәселе – Шымкент қаласы мәслихатының кейбір шешімдеріне өзгерістер енгізу туралы болды. Өздері сайланған саяси партиялардан шығуына байланысты Айжан Наимбекова мен Батыркелді Әшірбаевтың депутаттық өкілеттігі мерзімінен бұрын тоқтатылып, олар мәслихат жанындағы тұрақты комиссиялар құрамынан шығарылды. Сонымен қатар, мәслихаттың кәсіпкерлікті дамыту және цифрландыру жөніндегі тұрақты комиссиясының төрағасы болып Мұрат Қонақбаев сайланды.
Сессия барысында депутаттар Шымкент қаласы мәслихатының төрағасы Баһадүр Нарымбетовтің өз өтініші негізінде өкілеттігін тоқтату туралы шешімді қолдады. Одан кейін ашық дауыс беру нәтижесінде Мұрат Жолдықожаев Шымкент қаласы мәслихатының төрағасы болып сайланды. Депутаттар жаңадан сайланған төрағаға сенім білдіріп, оның жергілікті өкілді және атқарушы органдар арасындағы өзара іс-қимылды нығайтуға, сондай-ақ қала тұрғындарының мүддесіне бағытталған бастамалардың тиімді жүзеге асуына үлес қосатынына сенім білдірді. Өз кезегінде Мұрат Жолдықожаев көрсетілген сенімді ақтап, жүктелген міндеттерді абыроймен атқаратынын жеткізді. Жиын барысында сөз алған Баһадүр Нарымбетов депутаттық корпусқа бірлескен жұмысы үшін алғысын білдіріп, мәслихаттың алдағы қызметіне табыс тіледі. Сессия барысында қала әкімі Ғабит Сыздықбеков мәслихаттың бұрынғы төрағасы Баһадүр Нарымбетовке жергілікті өкілді орган қызметінің дамуына, депутаттық корпустың нәтижелі жұмысына және қаланың әлеуметтік-экономикалық өркендеуіне қосқан елеулі үлесі үшін алғыс білдірді. Осылайша, кезектен тыс сессия барысында күн тәртібіне енгізілген барлық мәселелер қаралып, тиісті шешімдер қабылданды. Мәслихаттың жаңа төрағасы сайланып, тұрақты комиссиялар құрамына өзгерістер енгізілді. Депутаттар алдағы уақытта қала дамуына бағытталған жұмыстардың жүйелі жалғасатынына сенім білдірді.
