МЕГАПОЛИСТЕН ШЫҚҚАН ЖАС ТАЛАНТ

Жүзу – төзімділік пен тәртіпті талап ететін спорт түрі. Шымкентте осы спортқа қызығатын жастардың қатары жыл сайын артып келеді. Солардың бірі – сегіз жылдан бері суда шеберлігін шыңдап жүрген жас спортшы Сабина Мұқан. Жастайынан бастаған арманына адал өрен бүгінде республикалық жарыстарда топ жарып, көк байрақты биікте желбіретуді басты мақсаты санайды.

Сабина Мұқан жүзу спортына алғаш мектептің бірінші сыныбында келген. Бұл таңдауға ата-анасының қолдауы мен өзінің суға деген ерекше қызығушылығы себеп болған. Содан бері бірде-бір жаттығуын жібермей, үздіксіз еңбектеніп келеді. Қазір ол мектепті тәмамдап, жоғары оқу орнына түсуге дайындалуда. Ол спортты өмірінің ажырамас бөлігі ретінде санайды.

Жас спортшының айтуынша, әр жарыс алдында әкесінің қолдауы оған ерекше күш пен сенім сыйлайды. Тынымсыз дайындықтың арқасында бүгінде ол суда түрлі күрделі әдістерді еркін орындайды. Шымкенттік жастардың спорттағы жетістіктері жылдан-жылға артып келеді. Олар халықаралық ареналарда ел намысын қорғап, көк байрақты көкте желбіретіп жүр. Себебі спорт – адамды шынықтырып қана қоймай, ерік-жігерді нығайтып, салауатты өмір салтына жетелейтін өмір мектебі.