31 ЗАҢСЫЗ ҚОҚЫС ОРНЫ АНЫҚТАЛДЫ

Шымкентте биыл 31 заңсыз қоқыс орны анықталды. Бұл туралы «Таза Қазақстан» жалпыұлттық жобасы мен «Заң және тәртіп» қағидатын іске асыру мәселелеріне арналған ведомствоаралық кеңесте айтылды. Жиында жыл басынан бергі атқарылған жұмыстардың қорытындысы шығарылып, экологиялық құқық бұзушылықтардың алдын алу шаралары талқыланды. Сондай-ақ заңсыз қоқыс орындарын жою және рейдтік іс-шаралардың тиімділігін арттыру бағытында нақты тапсырмалар берілді.

   Қала тазалығын сақтау бағытындағы жұмыстар биыл да қарқынды жалғасуда. Жылдың алғашқы алты айында жауапты мекемелер 576 рейдтік іс-шара ұйымдастырып, 23 мыңнан астам әкімшілік құқық бұзушылықты анықтады. Заңсыз қоқыс төгуге қарсы күрес барысында 188 автокөлік ұсталып, құқық бұзушыларға 59,6 миллион теңге көлемінде әкімшілік айыппұл салынды. Бұл шаралар қоршаған ортаны қорғаумен қатар тұрғындардың заңға деген жауапкершілігін арттыруға бағытталған. Заңсыз қоқыс орындарын анықтауда заманауи технологиялардың мүмкіндігі кеңінен пайдаланылуда. «Қазақстан Ғарыш Сапары» ұлттық компаниясының геоақпараттық деректері арқылы анықталған 31 заңсыз қоқыс орны толықтай жойылды. Бұл қоршаған ортаға келетін зиянды азайтып, қаланың санитарлық жағдайын жақсартуға мүмкіндік берді.

«Таза Қазақстан» экологиялық акциясы қала тұрғындарының белсенділігін де арттырды. Игі бастамаға 230 мыңға жуық адам қатысып, тазалық жұмыстарына 1438 арнайы техника жұмылдырылды. Нәтижесінде қала аумағынан 2 мың тоннадан астам қоқыс шығарылды. Кеңес барысында экологиялық мәдениетті қалыптастыру, мемлекеттік органдардың өзара іс-қимылын күшейту және құқық бұзушылықтардың алдын алу мәселелері бойынша нақты тапсырмалар берілді. Жауапты мекемелер бұл жұмыстардың жүйелі түрде жалғасатынын атап өтті.