«Айбын-2026» халықаралық әскери-патриоттық сайысында үздік атанған шымкенттік жас өрендер жеңіспен оралды. Теміржол вокзалында «Сұңқар» әскери-патриоттық клубының мүшелерін жақындары мен қала тұрғындары салтанатты түрде қарсы алды. Ауқымды додаға Қазақстаннан және шет мемлекеттерден құралған 64 команда қатысып, өзара бақ сынады.
Шаһардағы теміржол вокзалында Сабыр Рахымов атындағы әскери колледждің және қала оқушыларынан құралған әскери-патриоттық клуб мүшелерін салтанатты қарсы алу рәсімі өтті. Аталған жарыс Ақмола облысының Щучинск қаласында өтті. Әскери мектеп-лицейлер мен әскери оқу орындары арасында ұйымдастырылған байқауда Сабыр Рахымов атындағы әскери колледжі І орынды иеленсе, облыстар мен республикалық маңызы бар қалалардың әскери-патриоттық клубтары арасында Шымкент қаласының оқушыларынан құралған команда жалпыкомандалық есепте ІІ орынға ие болды.
Жас сарбаздарды қарсы алу шарасына қалалық әкімдік өкілдері, қорғаныс істері жөніндегі департамент қызметкерлері, әскери колледж ұжымы, Қарулы Күштердің ардагерлері және жеңімпаздардың ата-аналары қатысты. 64 команда арасындағы тартысқа толы додада шымкенттік жастар жоғары дайындықтарын, темірдей тәртібі мен мықты жауынгерлік рухын көрсетіп, үздіктер қатарынан көрінді.
Халықаралық жарыста қала намысын қорғаған «Сұңқар» командасы да жоғары нәтиже көрсетті. «Айбын-2026» сайысында қаламыздың мектептері атынан қатысқан «Сұңқар» командасы жүлделі ІІ орын алды. Сайыскерлер байқауда 11 түрлі бағдарлама бойынша бақ сынады.
Жалпы, аталған жиын 2015 жылдан бері 14 пен 17 жас аралығындағы жасөспірімдерді әскери тәртіпке, жауапкершілікке және отансүйгіштікке тәрбиелеп келеді.
«Айбын» – жастар арасындағы ең ірі халықаралық әскери-патриоттық жиындардың бірі. Биыл дода Ақмола облысындағы Шоқан Уәлиханов атындағы әскери колледж базасында ұйымдастырылды. Оған Қазақстанмен қатар Қырғызстан, Өзбекстан, Ресей және Әзербайжаннан мыңға жуық жас сарбаз қатысты. Қатысушылар әскери-спорттық, зияткерлік және шығармашылық бағыттар бойынша сынға түсті.
Сондай-ақ, жиынның жабылу рәсіміне Қазақстан Республикасының Президенті арнайы қатысып, жас сарбаздарға қолдау білдірді.
