Шымкентте тағы 30 отбасы жаңа баспанаға ие болды. Қала әкімі тұрғын үй кезегінде тұрған азаматтарға пәтер кілттерін салтанатты түрде табыстады. Сондай-ақ, баспана иелерін құттықтап, тұрғындарды қолжетімді тұрғын үймен қамту жұмыстары алдағы уақытта да жалғасатынын атап өтті.
Көпқабатты үйлер Бозарық шағынауданында орналасқан. Пәтерлер 20 жылға дейінгі мерзімге несиелік бағдарлама аясында ұсынылған. Баспана бақытына кенелгендердің бірі – 24 жастағы Төлебек Ибрагимұлы. Ол жетім балалар санаты бойынша екі бөлмелі пәтердің иесі атанды. Жас тұрғын бұл күнді асыға күткенін айтып, жаңа үйге қол жеткізу өзі үшін үлкен қуаныш екенін жеткізді.
Жаңа пәтерлер төмен пайыздық мөлшерлемемен берілген. Баспана иелері бұл қуанышты сәтті ұзақ күткен. Солардың бірі – Элмира Шерімқызы. Ол 20 жылдан бері тұрғын үй кезегінде тұрған. Бүгін көптен күткен арманы орындалып, жаңа пәтерге қол жеткізді.
Бүгінде бұл тұрғын үйлер барлық құрылыс нормалары мен сапа талаптарына сай пайдалануға беріліп отыр. Пәтерлер мемлекет қолдауымен тиімді әрі қолжетімді шарттар арқылы ұсынылған. Яғни, бұл баспаналардың бағасы нарықтағы өзге үйлерге қарағанда анағұрлым қолжетімді.
Шымкент қаласында жыл басынан бері 2500-ден астам пәтердің кілті табысталды. Өз шаңырағына қол жеткізген жандар үшін бұл – үлкен қуаныш. Жаңа қоныс иелері қала әкіміне алғысын білдіруде. Бүгінде қолжетімді баспана тұрғындардың тұрмысын жақсартып, өмір сапасын арттыруға мүмкіндік беріп отыр.
