Қаратау ауданында әмбебап жедел қызмет көрсету бекеті ашылды. Ерекшелігі өрт сөндіру, полиция және медицина қызметкерлері бір орталықта жұмыс істейтін болады. Басты мақсат төтенше жағдай кезінде уақыт жоғалтпай, тұрғындарға жедел көмек көрсету. Жаңа бекеттің салтанатты ашылуына ҚР Төтенше жағдайлар министрі Шыңғыс Әрінов пен қала әкімінің орынбасары Берік Беркінбаев арнайы қатысып, жоба жұмысына сәттілік тіледі. Заманауи үлгіде жабдықталған нысанда енді бірнеше қызмет бірлесе жұмыс атқарады. Мамандардың сөзінше, мұндай жүйе төтенше жағдай кезінде шешім қабылдау уақытын қысқартып, көмекті жедел ұйымдастыруға мүмкіндік береді.
Азаматтық қорғау саласының мамандары бұл республика көлеміндегі алғашқы кешенді бекеттердің бірі екенін айтады. Мұнда түскен шақыртуға қарай қызметкерлер бірден аттанбайды. Алдымен жағдай сараланып, оқиғаның деңгейі бағаланады. Соған сәйкес тиісті мамандар жіберіліп, қажетті көмек көрсетіледі. Бұл өз кезегінде күш пен уақытты тиімді пайдалануға жол ашады.
Бір орталыққа шоғырланған қызмет түрлері әсіресе медицина мамандарының жұмысын едәуір жеңілдетпек. Себебі бұрын әр мекеме өз алдына әрекет етсе, енді ақпарат пен әрекет бір жерден үйлестіріледі. Нәтижесінде науқасқа жету уақыты қысқарып, шұғыл көмек көрсету мүмкіндігі арта түспек. Бұған дейін тұрғындар жедел жәрдем мен өзге де қызметтердің кешігіп келетінін жиі айтатын. Ал жаңа бекет іске қосылғалы жағдай біршама жақсаратынына сенім білдіруде. Әсіресе шалғай орналасқан шағынаудандар үшін бұл үлкен қолдау.
