Кейбірі сауап үшін мал сояды, енді бірі оны міндет деп түсінеді. Алайда Құрбан айттың шынайы мәні неде? Арафа күні неліктен мұсылман үшін ең қасиетті күндердің бірі саналады? Кей жағдайда жұрт сауап іздеп жүріп, ысырапқа жол береді. Тіпті қайырымдылыққа жиналған қаржының көлеңкелі әрекетке жұмсалатын тұстары да кездеседі. Бұл сұраққа дін өкілдері баспасөз конференциясында жауап берді. Арафа – дұғаның қабыл болатын, сауаптың еселенетін күні. Дін мамандары бұл Құрбан айттың алдындағы ең маңызды күн екенін айтады. Көпшілік дәл осы уақытта ораза ұстап, кешірім тілеп, рухани тазаруға ұмтылады. Ал Құрбан айт – тек мал сою емес, адам баласының Жаратқанға жақындауы мен мұқтажға көмек қолын созуы.
Шариғат бойынша құрбандық шалу әр адамға бірдей міндет емес. Мамандардың айтуынша шамамен 85 грамм алтынның құнына тең байлығы бар адамға құрбан шалуға болады. Алайда кейбір азаматтар қарызға батып жүрсе де, елден қалмау үшін ысырапқа жол беріп жатады. Сондай-ақ имамдардың сөзінше, жағдайы келмей тұрған отбасы марқұмның айтын өткіземіз деп даңғазаға салынбағаны дұрыс. Себебі дінде шамадан тыс мақтан мен ысырап құпталмайды.Қасиетті мерекеде қайырымдылық жасау көбейетіні рас. Бірақ осы сәтті пайдаланып, құрбандыққа ақша жинаймыз, сауапқа кенелесіз деп жұрттан қаржы жинап, оны жеке басына жаратып кететіндер де бар. Сондықтан мамандар халықты тек сенімді мешіттер мен ресми қорлар арқылы көмек беруге шақырады. Себебі сауапты істің де сұрауы бар.
Құрбандық малына да шариғат нақты талап қойған. Мәселен, қой мен ешкі кемінде бір жаста, сиыр екі жаста, түйе бес жаста болуы тиіс. Сонымен қатар малдың көзі соқыр, аяғы ақсақ, не ауру болмауы қажет. Өйткені құрбандық – жай ғана рәсім емес, шынайы ықылас пен тазалықтың көрінісі.
Құрбан айтта дастарқан жаюдан бұрын, мұқтаждың жағдайын ойлау маңыздырақ дейді мамандар. Себебі бұл мереке түпкі мәні – бәсеке емес, береке. Бір үзім нанға зар болып отырған жанға көмек беру кей жағдайда қымбат той жасаудан әлдеқайда сауапты болуы мүмкін.
