Қазақстанның Еңбек Ері, халық жазушысы әрі қоғам қайраткері Мұхтар Шаханов өмірден өткелі 30 күннен асса да, ел жүрегіндегі орны бөлек. Халық шоқтығы биік тұлғаның есімін ұмытпақ емес. Соның дәлелі – Шымкент қалалық жасөспірімдер кітапханасында өткен еске алу кеші. Расында, нар тұлғаның заты өлсе де, аты өлмек емес. Шымкент қалалық жасөспірімдер кітапханасында өткен еске алу кешіне зиялы қауым өкілдері, мәдениет саласының мамандары мен жастар жиналды. Кеш барысында қатысушылар Мұхтар Шаханов шығармашылығының қазақ әдебиеті мен руханиятындағы орны жайлы кеңінен әңгіме өрбітті. Іс-шара барысында ақынның жүрекке жететін өлеңдері оқылып, сөзіне жазылған әндер шырқалды. Жастар ақын шығармаларын мәнерлеп оқып, оның поэзиясындағы ұлттық рух пен адамзаттық құндылықтардың тереңдігіне тоқталды. Сонымен қатар ақынның елдік мүдде жолындағы қайсарлығы мен қоғамдағы өткір мәселелерді батыл көтерген азаматтық ұстанымы сөз болды. Кеште сөз алған зиялы қауым өкілдері ақынның шығармашылық мұрасын жас ұрпаққа кеңінен насихаттаудың маңыздылығын атап өтті. Қатысушылардың айтуынша, Мұхтар Шахановтың өлеңдері мен публицистикалық еңбектері – ұлттық сананы оятатын рухани қазына. Қазақ әдебиетінде өшпес із қалдырған заңғар тұлғаның есімі халық жадында мәңгі сақталары анық. Ал оның мол рухани мұрасы әлі талай буынға бағыт-бағдар беріп, ұлттық құндылықтарды дәріптей бермек.
