Шымкентте тұрғын үйлерді басқару мәселесі талқыланды. «AMANAT» партиясының «Тұрғындар Аманаты» жобасы аясында өткен жиында қала әкімдігі мен сала өкілдері бас қосты. Форумда үй басқарудағы ашықтық, тұрғындармен кері байланыс және инфрақұрылымды жаңғырту мәселелеріне басымдық берілді.
Аталған жиын «Үйді басқару: жауапкершілік, сенім, нәтиже» тақырыбын арқау етті. Жалпы, қалада 2595 көпқабатты тұрғын үй бар. Оның ішінде 1428 үй кондоминиум нысаны ретінде тіркелген. Мамандардың мәліметінше, бастама аясында тұрғындарға қолайлы әрі қауіпсіз орта қалыптастыру жұмыстары жалғасуда. Сонымен қатар, жиында қала әкімі Ғабит Сыздықбеков шаһарда халықты толғандырған түйткілдерді шешуге бағытталған тұрғын үй саласындағы жаңғырту шаралары кезең-кезеңімен жүзеге асырылып жатқанын атап өтті.
Бүгінде қалада шамамен 145 шағын және орта бизнес субъектісі жұмыс істейді. Сонымен қатар, 170 жаңа нысан пайдалануға беріліп, 71 көпқабатты тұрғын үйге жөндеу жұмыстары жүргізілген. Сондай-ақ 437 балалар ойын алаңшасы салынды. Алдағы уақытта тағы 148 ойын алаңшасын салу жоспарланып отыр. Қалада алдағы уақытта тұрғын үй саласына қатысты арнайы фронт-офис ашу жоспарланып отыр. Жалпы, бастаманың басты мақсаты – тұрғындардың мәселесін созбалаңға салмай, жедел шешуге ықпал ету және тұрғын үй саласы бойынша түсіндіру жұмыстарын күшейту. Жиын барысында партия атынан бірқатар азаматтарға алғыс хаттар табысталды.
