«АЙҒАҚ» ТАБЫСТЫРҒАН ТАҒДЫР

   15 мамыр — Халықаралық отбасы күні. Бұл күн -жүрек жарастырған жандардың ортақ мерекесі. Бүгінде тағдырдың қалауымен Айғақ телеарнасы арқылы табысқан жұптар да бар. Солардың бірі — Нұрлан мен Альмира. Жылдар жылжып, уақыт алмасқанымен, сол таныстықтың табы әлі де тарқамаған.

   Нұрлан мен Альмира 2008 жылы Айғақ телеарнасындағы жүгіртпе хабар арқылы танысқан. Көзге елеусіз көрінген бір жарнама, кейін бүтін бір әулеттің бастауына айналарын кім білген?! Екеуінің таныстығы сезімге ұласып, бес жыл бойы қыз бен жігіт болып араласады. Осы аралықта Нұрлан әскер қатарына шақырылып, Отан алдындағы борышын да абыроймен өтеп келген. Ал, 2012 жылы олар шаңырақ көтеріп, өмірдің талай сынағы мен белестерін бірге еңсерді. Бүгінде Нұрлан мен Альмира бір ұл, бір қыз тәрбиелеп отырған үлгілі отбасы.

   Шаңырақтың отын бірге жағып, бір арманға қол ұстасып келгендеріне 15 жыл толған. Осы жылдар ішінде Нұрлан мен Альмираның арасындағы сенім мен сыйластық тереңдеп, берекелі отбасының берік іргетасына айналды. Қазіргі таңда олардың Әлімжан мен Айлин есімді перзенті бар. Альмираның айтуынша, отбасындағы татулықтың сыры – сабыр мен түсіністікте. Көп жағдайда өзінің сабырлық танытып, қолдау білдіруі арқылы бүгінде бір-біріне деген құрметті сақтап келеді.

   Әңгіме барысында тағдыр табыстырған жұптар жар таңдаудан да, мамандық таңдаудан да қателеспегендерін тебірене айтты. Бүгінде Нұрлан Шоқан Уәлиханов атындағы №18 мектепте алғашқы әскери дайындықтан сабақ берсе, жары медицина саласында еңбек етеді. Бала тәрбиесіне келгенде де екеуі бір арнадан табылып, ортақ шешім қабылдайды. Осындай үйлесім мен түсіністік олардың отбасын одан әрі берекелі етіп отыр.