1000 ШАҚЫРЫМНАН АСТАМ ЖОЛ САЛЫНАДЫ

    Шымкентте жол-көлік инфрақұрылымын дамыту бағытында ауқымды жұмыстар жүргізілуде. Жалпы, 2025 жылдың қорытындысы бойынша шаһарда ұзындығы 1059,2 шақырым жол салынып, көлік қатынасын жақсартуға бағытталған 6 ірі жоба пайдалануға берілді. Бұл туралы қала әкімдігінің Жолаушылар көлігі және автомобиль жолдары басқармасының басшысы арнайы брифинг барысында мәлімдеді.

Атап айтқанда, өткен жылы жалпы ұзындығы 21,1 шақырымды құрайтын бірқатар маңызды нысан ел игілігіне тапсырылды. Мемлекет басшысының тапсырмасына сәйкес, А-2 айналма жолын жаңғырту жұмыстары қарқынды жүргізіліп, жобаның бүгінде 90 пайызы аяқталған. Сондай-ақ қаланың орталығын Ташкент–Алматы тас жолымен байланыстыратын Қонаев даңғылының жалғасы 85 пайызға орындалып, оның екінші кезеңі пайдалануға берілді.

Қалада бірқатар жаңа жол салынып, маңызды көшелерге жөндеу жұмыстары жүргізілді. Атап айтқанда, Жандосов көшесінің жалғасы, Асар мен Шымсити шағынаудандарын байланыстыратын жол, сондай-ақ Қызылсай шағынауданына кіреберіс бағыттар ел игілігіне берілді. Сонымен қатар, кәріз жүйесі тартылғаннан кейін ойдым-ойдым күйге түскен Нұртас шағынауданының 10 көшесінде қайта жаңғырту жұмыстары атқарылды. Алайда аталған жолдардың сапасына қатысты тұрғындар тарапынан сын-пікірлер де айтылуда.

Бүгінде қаладағы бағдаршамдардың 81 пайызы заманауи интеллектуалды жүйеге қосылған. Басқарма басшысының айтуынша, бұл жүйе жол қозғалысын тиімді реттеп қана қоймай, әрбір бағдаршамның жұмысын толық бақылауға мүмкіндік береді. Тіпті, апта сайын әр бағдаршамның қанша рет өшкеніне дейін жіті қадағаланып отырады.