Елімізде ауылшаруашылық өндірісін дамыту маңызды мәселелердің қатарында. Бүгінде өңірімізде мемлекет тарапынан көрсетілетін көмекті тиімді пайдаланып, өз кәсібін дөңгелетіп отырғандар да аз емес. Әсіресе, қазақтың дәстүрлі кәсібі саналатын малшаруашылығымен айналысатын кәсіпкерлер қатары Төлебиде біршама. Соның бірі Алғабас ауылының тұрғыны, жеке кәсіпкер Тәңірберген Байназарұлы. 4 баланың әкесі осы саланы 2015 жылы бастап, бүгінде ет бордақылаумен айналысады. Кәсіпкердің айтуынша, дайын өнімді Төлеби ауданындағы орталық базарға өткізіп, әр сатылымнан 70-80 мыңға дейін пайда алады. Қожалық иесі қазір жаз айында 25-30 бас сиыр өсіріп, қысқа қарай ірі қара санын 45-50 басқа жеткізуді жоспарлап отыр.
«Болашақ нұры» аталатын ауылшаруашылық өндірістік кооператив өкілінің қарамағында 160 бас ірі қара, 40 бас бұзау бар. Қазіргі таңда аталған кооператив бал араларын өсірумен қатар, сүт өнімдерін өндірумен де айналысады. Күнделікті алынатын сүт көлемі 1500 тоннаны құрайды.
Төлеби ауданының тұрғындары тек малшаруашылығымен шектелмейді. Сондай-ақ, Алғабас ауылында «Қанат» жауапкершілігі шектеулі серіктестігі құлпынай өсірумен айналысады. Қызығы мен қиыншылығы қатар жүретін егін шаруашылығында бастапқы кезеңде біраз шығындар да кездескен. Бүгінде аталған серіктестік Үкімет тарапынан көмек алмай, 6-7 адамды жұмыспен қамтып отыр.
Кемеқалған ауылдық округі де шаруашылық саласында белсенді. Аймақтағы ең үлкен жобалардың бірі- «Қазығұрт бақтары» ауылшаруашылық өндірістік кооперативі. 140 гектарды қамтитын баққа биыл Италиядан 265 000 түп алма ағашы отырғызылған. Грении Смит, Айдаред, Голден Делишес, Гала сынды сұрыпты алмалар піскенде жиын-терімге 150 жұмысшы тартылады. Былтыр 1 гектардан орта есеппен 10 тонна өнім алса, биыл 20 тонна өнім өндіру жоспарланып отыр.
