Республикалық маңызы бар қала деп танылғанына 3 жылға жуықтаған Шымкентті көркейту мақсатында шаһардың бас жоспары қайта әзірленіп жатыр. Бас жоспар демекші, Шымкент қаласының бас жоспары соңғы рет 2011 жылы қабылданып, бекітілген жобаға сәйкес жұмыстар жүргізілген. Алайда, қала әкімінің орынбасарының сөзінше жоспарда көрсетілген жұмыстар бүгінгі күннің талабына сай емес. 1 айлық талқыға түскелі отырған жоспар аясында 2035 жылға дейін қала тұрғындарының саны 2 миллионға жетеді деп есептелген.
Сонымен қатар, қала аумағын игеру барысында қаланың шекаралары, аумақтық даму схемалары, тарихи, мәдени және рухани мұраны сақтау, көлік инфрақұрылымын дамыту ұстанымдары сынды ұсыныстар толық қамтылады. Жиын барысында 2011 жылғы бекітілген бас жоспарда жел бағыты ескерілмегендігі де айтылды. Ұсынылған жоспарда бұрынғы олқылықтар түзетіліп, қала аумағында бесінші аудан пайда болатындығы жарияланды. Болашақ ауданның шекарасы мен атауы әлі таңдалмаған. Қала аумағындағы әр ауданда даму орталығын салу жоспарда бар.
Еліміздің үшінші мегаполисінің жоспарын дайындауға Киев, Минск, Санкт-Петербор қаларының кәсіби сәулетші мамандары да қатысып отыр. Жергілікті жеріміздің қалай жанданатынына қызығушылық танытып, қоғамдық талқылауда пікір білдіремін деген қала тұрғындарына 21 маусым мен 21 шілде аралығында Халықтар Ассамблеясының есігі ашық. Концептуалдық тұжырымдама негізінде 2022 жыл соңына дейін қаланың жаңа бас жоспары толық әзірленіп, ҚР Премьер-Министрінің келісімінен кейін, Үкімет қаулысымен бекітілетін болады.
Суреттер: Шымкент Келбеті Ресми Парақшасы
