Шығыс Қазақстан облысында іссапарда жүрген “Айғақ” телеарнасының шығармашылық тобы бастаған қоғамдық делегация “Аустрия жолын” бағындырды.
Марқакөл мен Қатон-Қарағайдың арасын негізгі жолмен жүріп өтсең — 500 шақырым. Ал, тауды беткейлеп өтетін Аустрия жолымен 90 шақырымдық жер. Төте жол болғанымен, бұл бағытпен өтуге көбі тәуекел жасай бермейді. Қоғамдық делегация құрамындағы Түркістан облыстық мәслихатының депутаты, «Айғақ» телеарнасының басшысы Дулат Әбіш, Түркістан облыстық қоғамдық кеңесінің мүшесі Бегалы Рысбеков, Жезқазғандық өлкетанушы Айткамал Қожырбаев, Шымкент қаласындағы Дендросаябақ жанашыры — Сабыр Ташимбетов, Наби Хопабаев және телеарна редакторы мен операторлары тарихи ескі жолмен жүруге бел буды.
Теңіз деңгейінен 2141 метр биікте жатқан тауды жағалап жүрген темір тұлпарлар табиғаттың жауынды, бұлтты-тұманды, қарлы-боранды, батпақты жолдарын бағындырып, Бұқтырма мен Қарақаба өзенін кесіп өтетін күрделі 7 ағаш көпірден өтті.
Неліктен Аустрия жолы? Ол қандай жол? Көпшілік бұл жөнінде біле бермейді.
Өр Алтайға жолыңыз түссе қос бетіндегі катонқарағайлықтар да, марқакөлдіктер де асқақ асуларды асатын «Аустрия жолы» аталатын көне соқпақтың болғанын, оның тарихы жайлы айтады.
Бұл жолды әскери тұтқындар салған. 1914-1918 жылдағы бірінші дүниежүзілік соғыс кезінде Австрия-Венгрия тарапында соғысып, тұтқынға түскен чех, мажар және словак жауынгерлері таза қол еңбегімен, нақтырақ, қайла мен күректің көмегімен салған екен.
Асқақ асулар мен қиялардан өтетін жалғыз-бірізді жолдың жобалаушысы тұтқындар арасындағы әскери инженерлер болған дейді. Олар құрылысты Альпідегі жолдардың үлгісімен салған. Атақты голливуд актері, Калифорнияның 38-ші губернаторы Арнольд Шварцнеггердің атасының сол соғыста тұтқынға түсіп, туған жеріне оралмағандығы және осы құрылысқа қатысқан деген ғылыми негіздемелер бар.
Осылайша, асқаралы таулардың арасындағы жұмбақ “Аустрия жолы” ашылды. Тарихи сәттер, маңызды оқиғалар, экстримді жолдардан тұрған іссапар жайлы арнайы хабарды жақын күндері “Айғақ” телеарнасы назарларыңызға ұсынады.
Арайлым ӘБСАҒАТ
aigak.kz тілшісі
