Бірқатар екінші деңгейлі банктерде (бұдан әрі – ЕДБ) арнайы шотты автоматты түрде ашу Электрондық үкімет порталында (бұдан әрі – eGov) әлеуметтік төлемдерді, жәрдемақыларды және зейнетақыларды тағайындау бойынша жеті мемлекеттік көрсетілетін қызметті ресімдеу кезінде қолжетімді болды. Бұл туралы мәлімет ҚР Еңбек және әлеуметтік қорғау министрлігінің ресми сайтында жарияланды.
Бұрын eGov порталында қандай да бір төлемдерді тағайындауға өтінім берген кезде 20 таңбалы Iban-шот нөмірін қолмен енгізу қажет болатын. Енді жүйе ЖСН бойынша өтініш берушінің қолжетімді шоттары туралы деректерді алатын болады, бұл шот нөмірін қате енгізу ықтималдығын жояды. Банктерде арнайы шот болған жағдайда, ол мемлекеттік көрсетілетін қызметке өтінім берген кезде тізімде пайда болады.
Ал eGov порталында мемлекеттік көрсетілетін қызметті алуға өтінім беру кезінде қолайлы шот ашу үшін пайдаланушыларға мыналар қажет:
- қажетті қызметті таңдау, міндетті жолдарды толтыру;
- тізімнен банкті таңдаңыз;
- ақша қаражаттарын есептеу үшін шотты таңдау (банк жүйесінен автоматты түрде ұсынылады);
- қолжетімді әдістердің бірімен өтінімге қол қойып, оның өңделуін күтіңіз.
Сұрау мәртебесі туралы деректерді пайдаланушының eGov.kz-тегі жеке кабинетінде бақылауға болады.
Қазіргі уақытта eGov.kz-те үш қазақстандық ЕДБ-де арнайы шот ашуға болады. Олар «Банк Центр Кредит» АҚ, «Kaspi Bank» АҚ және «Қазақстан Халық Банкі» АҚ.
Оны келесі мемлекеттік көрсетілетін қызметтерді алу кезінде ашуға болады:
– баланың туылуына және оның күтіміне байланысты жәрдемақы тағайындау;
– мүгедектігі бар баланы тәрбиелеп отырған анаға немесе әкеге, бала асырап алушыға, қорғаншыға (қамқоршыға) жәрдемақы тағайындау;
– мүгедектігі бойынша мемлекеттік әлеуметтік жәрдемақы тағайындау;
– асыраушысынан айырылу жағдайы бойынша мемлекеттік әлеуметтік жәрдемақы тағайындау;
– жерлеуге арналған біржолғы төлемді тағайындау;
– көпбалалы отбасына жәрдемақы тағайындау;
– мемлекеттік базалық зейнетақы төлемін тағайындау.
Болашақта осы функцияны пайдалануға болатын қызметтердің тізімі кеңейеді.
Бұл мүмкіндік ҚР Еңбек және халықты әлеуметтік қорғау министрлігінің, ҚР Цифрлық даму, инновациялар және аэроғарыш өнеркәсібі министрлігінің Мемлекеттік көрсетілетін қызметтер комитетінің, «Ұлттық ақпараттық технологиялар» АҚ, «Банк Центр Кредит» АҚ, «Kaspi Bank» АҚ және «Қазақстан Халық Банкі» АҚ бірлескен жұмысының нәтижесінде жүзеге асырылды.
