Биыл әлем таныған, әлемге қазақ елін танытқан Абай Құнанбайұлының туғанына 176 жыл! Адамзаттың бес дұшпаны мен бес асыл ісін кестелі өлеңімен өрнектеп, көрнекті ойымен жеткізген ғұлама ғалым, қазақ әдебиетінің негізін қалаушы ретінде тарихта өшпес із қалдырғаны мәлім. Бүгін 10 тамыз қазақ халқының ғасыр перзентінің туған күніне орай «Абай» ескеркішіне гүл шоқтары қойылып, құрмет көрсетілді.
Таң атысымен Шымкентте Абай өлендері аспанға әуелеп, көкті шарлады. Қоңыр сазды «Көзімнің қарасы» әнін арлы-берлі өткендердің бірі қосылып айтып, бірі ұйып тыңдап тұрды. Бұл дегеніміз «Абай мұрасының мың жыл өтсе де дәмі кетпес» деп Мағжан Жұмабаев айтқандай, оның тағылымы мен тәлімі мол, пайым парасат пен ұлттық санаға терең тамыр тартқан рухани асыл мұрасы мәңгілік жаңғырып тұрары анық. Әдебиет алыбының туған күніне орай Шымкент қаласының «Абай» саябағында дәуір данасының рухына құрмет көрсетіліп, өлең жолдарынан сыр шертілді.
