Шымкенттің қоғамдық делегациясын Ходжендтің мэрі қабылдады

Тәжікстанның өнеркәсіптік орталықтарының бірінен саналатын Ходжендтің Шымкентпен бауырлас болуы тектен тек емес. 2003 жылы басталған ынтымақтастық 2016 жылы қайта жаңғырып, Қазақстан делегациясының осындағы сапарымен ерекшеленген еді. Сол тұста, 27 үйден тұратын арнайы орамға «Шымкент» атауы да берілді. Көшенің тазалығы мен келбеті, кеңдігі, Моғолтау жоталарының әдемі көрінісі — біздегі Төлеби, Түлкібас аудандарының табиғатын еске салады. Тазалығы өз алдына тұнып тұр. Балалардың алаңсыз ойыны да көше сәнін келтірген. Біз көрген жол жиегіндегі тұт пен анар ағашы — ерекше күтімнің бар екендігін аңғартты. Өйткені, көше бойына шыршалармен қатар отырғызылған бұл жеміс ағаштарының көркі көңіліңді жайландырады. Табиғатты аялау әрі көше мәдениеті деп осыны айт. Бір сәт бізде де осындай тәртіп болса, үйдегі тәрбиемен қатар дамитын санаға мейірімділік дәнін себер тазалық мәдениеті әлдеқашан орнар еді дейсің.

Ходженд бір жағынан өрікті кептіріп, Орта Азия мемлекеттеріне экспорттау ісінде көш басында. Сондықтан болар, өрік ағаштарын мұнда көптеп кездестіресіз. Бұл есепке анарды қосыңыз. Дегенмен, асқан еңбек пен жұмысшы күшінің қолымен біртіндеп терілетін жеміс ағаштары тау аңғарларында өсіріледі екен. Біз таныған Ходжендтің тағы бір сыры осында. Аграрлы-өнеркәсіптік аймақ.

Мұндағы қала және облыс әкімдігі Сырдарияның келбеті келіскен әсем тау көрінісіне қарсы беткейде орналасыпты. Ходженд әкімдігінің ғимараты Хрущев үйлерінің Қазақстанда салына бастаған уақытында тұрғызылған. Жарты ғасырдың көзін көрген әкімдікте қоғамдық делегацияны Маъруф Мухаммадзода қабылдады. Бауырлас қаланың тұрғындарын ерекше ықыласпен қарсы алып, Қазақстан Республикасының Тұңғыш Президенті-Елбасы Нұрсұлтан Назарбаевтың ерен еңбегін айрықша атап берді. Ал, Тәжікстан Президенті Эмомали Рахмонның да елі үшін атқарып жатқан айтулы істерін айтып, мақтанды. Парсы тілдес мемлекеттің Қазақстанмен достығы мен қарым-қатынасының тарихы — әрине тереңде жатыр. Ашаршылық жылдарында Памир асып, Тәжікстанға тұрақтаған қазақтардың бірқатары Ходжендке де сіңісіп кеткен. Тарихи, мәдени байланысымыздың осы тұста мәңгі екендігі аян.

Шымкенттің «Бал Текстилі» тоқыған Елбасының бейнесі бар шағын кілемі енді Ходженд әкімдігінің төрінде ілулі тұрады. Тиісінше, ұлттық құндылығымызды айшықтай түсетін қос ішекті домбыра да сол қатардан орын алмақ. Қазақстаннан әкелінген кәдесыйды ерекше ілтипатпен қабылдаған қала мэрі осылай деп уәдесін берді. Ал, Шырайлы Шымкенттің бүгіні мен өткенін баяндайтын кітап-альбом Ходженд қаласының тұрғындары мен қонақтары үшін танымдық тұрғыда жан-жақты әрі қызықты мағлұмат берері сөзсіз.