ЭКОЛОГИЯЛЫҚ МӘСЕЛЕГЕ ҚАТЫСТЫ ШАҒЫМ ТЕКСЕРІЛЕДІ

Шымкентте кәсіпорындардан шығатын жағымсыз иіске қатысты тұрғындар шағымы назарға алынды. Қала әкімінің көшпелі кездесуінде көтерілген мәселені зерделеу үшін арнайы комиссия құрылып, тексеру жұмыстары басталды. Мамандар алғашқы кезекте «ПетроҚазақстан Ойл Продактс» мұнай өңдеу зауытының жұмысымен танысып, ауаға тарайтын шығарындыларға қатысты түсіндірме алды.

Шаһарда орналасқан кәсіпорындардан шығатын Жағымсыз иіске қатысты тұрғвндар шағым айтқан болатын. Мәселе аясында арнайы тексеру комиссиясы құрылып, мұнай өңдеу зауытына барды. Мамандар өндіріс барысымен танысып, қоршаған ортаға әсер ету мәселелерін талқылады. Кездесу барысында нысандағы тазарту жүйелерінің жұмысы мен ауаға тарайтын заттарға қатысты түсініктеме берілді. Жауапты мамандар экологиялық талаптардың сақталуына назар аударды.

Зауыт өкілдерінің мәліметінше, кәсіпорындағы негізгі өндірістік қондырғылардың 99 пайызы арнайы тазарту жүйелерімен жабдықталған. Мамандардың түсіндіруінше, өндіріс барысында зиянды түтін емес, су буы бөлінетін жағдайлар да бар. Сонымен қатар нысанда ылғалды тазарту жүйесі орнатылғаны айтылды.

Мұнай өңдеу аймағына жақын орналасқан сегіз елді мекеннің тұрғындары үшін ауа сапасы мәселесі өзекті. Осыған байланысты мамандар өндіріс аумағында арнайы құрылғылардың көмегімен ауа құрамын бірнеше рет бақылады. Бақылау барысында атмосфералық ауаның ластану деңгейіне қатысты көрсеткіштер зерделенді. Зауыт өкілдері қолданыстағы тазарту жүйелері туралы ақпаратпен таныстырды.

 «ПетроҚазақстан Ойл Продактс» — Шымкенттегі ірі мұнай өңдеу кәсіпорындарының бірі. Бүгінде зауытта төрт мыңнан астам адам тұрақты жұмыспен қамтылған. Кәсіпорынның өндірістік қызметімен қатар, экологиялық қауіпсіздік талаптарын сақтау мәселесі де маңызды. Әсіресе өндіріс аумағына жақын орналасқан елді мекен тұрғындарының денсаулығы мен қолайлы ортада өмір сүруі басты назарда екені айтылды.Тұрғындардың алаңдаушылығына негізді жауап беру үшін ауа сапасына жүргізілген бақылау қорытындылары ашық көрсетілді.