Профессор Қойшыбек Сұлтановқа құрмет көрсетілді

Түркістан жоғары аграрлық колледжі Тәуелсіздік мерекесін кең көлемде атап өтті. Мерекелік іс-шара аясында, колледж басшылығы ауыл шаруашылығы саласының дамуына елеулі үлес қосқан профессор, ардагер ұстаз Қойшыбек Сұлтановқа Түркістан облысының «Құрмет Грамотасын» табыстады.

Сондай-ақ, білім ордасында енді ардагер ұстаздың есімін иеленген аудитория бар. Тәуелсіздік мерекесінің қарсаңында аталмыш оқу кабинетінің лентасы қиылды. Қойшыбек Сұлтанов — Оңтүстік Қазақстан облысы, Сайрам ауданы, Көмеш-бұлақ ауылында туылған. 1965 жылы Алматы зооветеринарлық институтын бітіргеннен соң еңбек жолын  Қайнарбұлақ совхозында мал дәрігері болып бастады.

1976 жылы Мәскеу қаласындағы ғылыми зерттеу институтына аспирантураға түсіп, 1982 жылы кандидаттық диссертация қорғаған ол мал дәрігерлігі ғылымдарының кандидаты атанды. 1982 жылдан бастап Сайрам ауданы, «Ленин жолы» совхозында партком хатшысы. 1988-1993 жылдары аралығында Алғабас ауданы, «Прогресс» совхозының бас мал дәрігері, 1993 жылдан бастап, 1996 жыл аралығында Сайрам ауданы «Ақсу» селосында аудандық мал дәрігерлік зертханасының директоры, 1996 – 1998 жылдары Сайрам ауданы «Қызыләскер» ауыл әкімшілігінің әкімі лауазымдарын абыроймен атқарды.

Қойшыбек Сұлтанов 2005 жылдан бері Түркістан жоғары Агроколледжінің оқытушысы болып еңбек етіп келеді. Оның ауыл шаруашылығы саласын дамытуда еңбегі орасан. Аталмыш салада бірқатар зерттеулер жүргізіп малдардың физиологиялық, политологиялық, паразитологиялық салаларын тереңінен зерттеген оқу құралдарын шығарған профессор.