БҮГІНГІ ТӘРБИЕ – ЕРТЕҢГІ БОЛАШАҚ

Ата сөзі ақылдың көзі. Ұлттық құндылықты ұлықтап, ұрпақтар сабақтастығын жалғау мақсатында Шымкент қаласының ардагерлері мен зиялы қауым өкілдері бір алаңда тоқайласты. Басқосуда отбасы тәрбиесі, ұлттық болмыс, рухани сабақтастық пен жас ұрпақтың елжандылық қасиетін қалыптастыру мәселелері талқыланды.

Форумға «Ардагерлер ұйымы» республикалық қоғамдық бірлестігі орталық кеңесінің төрағасыда қатысты. Ол аға буынның ел ертеңін қалыптастырудағы орны айрықша екенін атап өтті. Өйткені қариялардың өмірлік тәжірибесі мен тағылымды сөзі кейінгі толқынға бағыт-бағдар беретін рухани темірқазық.
Тәрбие тал бесіктен деген қағиданы негізге алған қатысушылар ұлттық болмысты ұрпақ санасына салт-дәстүр арқылы сіңіру қажеттігін жеткізді. Мұны сөзбен ғана емес, іспен де ұғындыру үшін қазақы нақыштағы киіз үйлер тігіліп, үлкенге ізет, кішіге құрмет көрсетудің өнегесі дәріптелді.

Жас буынға ақыл айтып қана қоймай, бағыт бағдар көрсету де маңызды. Осыған дейін аға буын өкілдері арасында спартакиада ұйымдастырылып, салауатты өмір салтын ұстанудың үлгісі көрсетілген. Мұндай бастамалар жастарды спортқа баулып, есірткі мен өзге де зиянды әдеттерден аулақ болуға үндейді. Сонымен қатар, қариялар қоғамдағы ардагерлердің мәртебесі мен құқықтарын қорғау да назардан тыс қалмауы керектігін атап өтті.

Форум соңында ұлттық құндылықтарды дәріптеу мен ұрпақтар сабақтастығын нығайту мәселесі қаралды. Айтылған келелі сөздер отбасыдан басталған тәлім-тәрбиенің қоғаммен үндесіп, әр азаматтың күнделікті ісінен көрініс табуы қажет. Өйткені бабадан қалған аманатты сақтау – өткенге тағзым ғана емес, келер ұрпақ алдындағы жауапкершілік.