ИНЖЕНЕРЛІК ЖЕЛІЛЕР ЖАҢҒЫРТЫЛУДА

Шаһардың дамуы тек жаңа ғимараттармен өлшенбейді. Тұрғындардың сапалы ауыз суға, үздіксіз электр қуатына, табиғи газ бен жылуға қолжетімділігі де маңызды. Шымкентте осы бағыттарда қандай жұмыстар атқарылып жатыр? Алда қандай өзгерістер күтіп тұр? Бұл сауалдарға сала мамандары баспасөз брифингінде жауап берді.
Тіршілік нәріне қолжетімділік тұрғындар үшін өзекті мәселенің бірі. Өткен жылы демеушілер есебінен 32 шақырым су құбыры тартылып, Текесу мен Айкөл елді мекендері орталықтандырылған ауыз су жүйесіне қосылды. Нәтижесінде 11 мыңға жуық тұрғын сапалы ауыз сумен қамтылды. Қазір қала аумағының кеңеюіне байланысты жаңа тұрғын алаптарды сумен жабдықтау жобалары әзірленіп, Оңтүстік тұрғын алабында құрылыс жұмыстары жүргізілуде.

Қала үлкейген сайын электр энергиясына деген сұраныс та арта түседі. Осыған байланысты, биыл электрмен жабдықтау бағытында мемлекеттік бюджет есебінен 8 жоба жүзеге асырылуда. Жаңа тұрғын алаптар мен өндірістік аймақтарға инженерлік желілер тартылып, қосалқы станциялардың қуатын арттыру көзделген. Сонымен қатар, қуаттылығы 500 мегаватт болатын бу-газ қондырғысының құрылысы жоспарланып отыр. Бұл бастамалар қаланың энергетикалық әлеуетін нығайтуға бағытталған.

Шымкенттегі 81 елді мекеннің 66-сы табиғи газбен толық қамтылған. Ал қалған аумақтарды газдандыру жұмыстары кезең-кезеңімен жүзеге асырылмақ. Қазір Жаңаталап тұрғын алабы мен Сауда-логистикалық орталығына магистральдық газ құбырын тарту жұмыстары жүргізілуде. Бұған қоса, бірқатар шағынауданда жобалық құжаттар әзірленіп жатыр. Мамандар газ желілерінің техникалық қауіпсіздігіне де айрықша назар аударуда.

Сарышұнақ аяз түспей тұрып, жылу жүйелерін сақадай сай ету маңызды міндет. Қалада жылыту маусымына дайындық жұмыстары жүргізіліп, гидравликалық сынақ кезінде анықталған 135 ақау толық жөнделді. Сонымен қатар, магистральдық жылу құбырларын жаңғырту және желілердің тозған бөліктерін ауыстыру жұмыстары атқарылуда. Мамандардың мәліметінше, қазандықтар, сорғы станциялары, көпқабатты тұрғын үйлер мен әлеуметтік нысандардың дайындығы қамтамасыз етілген.

Қаланың тыныс-тіршілігі ауыз су, электр, газ және жылумен ғана шектелмейді. Кәріз жүйесін кеңейту мен көшелерді жарықтандыру да тұрғындарға қолайлы орта қалыптастырудың маңызды бөлігі. Қазір қаладағы 81 елді мекеннің 27-сі су бұру жүйесімен қамтылған. Биыл бірнеше тұрғын алап пен қала орталығындағы көшелерде кәріз желілерін тарту жоспарланған. Ал сыртқы жарықтандыру бойынша қала толық қамту көрсеткішіне жетті. Жалпы, инженерлік инфрақұрылымды жаңғырту және жаңа қуат көздерін іске қосу жұмыстары алдағы жылдары да кезең-кезеңімен жалғасын таппақ.