Ел боламын деген жұрттың еңсесін тіктеп, рухын асқақтататын ұлық мерекесі бар. Ол – Республика күні. 1990 жылғы 25 қазанда қабылданған мемлекеттік егемендік туралы декларация – азаттыққа бастар жолдың бастауы. Бүгінде бұл күн елдігімізді әйгілеп, бірлігімізді бекемдейтін мерейлі мейрамға айналды. Осыған орай Шымкентте шаһардың ең алып көк байрағын көтеру рәсімі өтті. Салтанатты шараға қала әкімі, ардагерлер мен жалынды жастар қатысты.
Көк байрақ көкке көтеріліп, Әнұран әуелеген сәтте алаңға жиналған жұрттың рухы бір серпілді. Бұл жай ғана салтанатты рәсім емес, бейбіт күннің қадірін ұғындырып, азаттықтың бағасын сезіндіретін тағылымды сәт. Тәуелсіздіктің тұғырын биік ұстау бүгінгі ұрпақтың да, келер буынның да ортақ парызы. Осы орайда қалалық қоғамдық кеңес төрағасы мерекеге орай ақжарма тілегін жеткізді. Елдің ертеңі жастар. Ал олардың бойына отаншылдық рухты сіңіру бүгінгі күннің маңызды міндеті.
