Тарихы терең Тараза қаласының туған күніне орай «Жеңіс» саябағы аумағынан «Үшбұлақ» жағажайының ашылуы өтті.
Көп жылдан бері қараусыз жатқан канал жағалауы, бүгінде тараздықтардың сүйікті демалыс аймағына айналып отыр. Салтанатты шарада қала тұрғындары мен қала қонақтарына керемет әсер сыйлаған жағлаудың жалпы аумағы — 6,5 га. Ал ұзындығы — 700 метрді құрап отыр.
Жоба барысында жерді абаттандыру кезінде аумақтан 10 мың тоннадан астам қоқыс шығарылды. Ал каналдың үстінен екі жағалауды байланыстырп тұрған сәулетті көпірдің құрылысы қала тұрғындарын бей-жай қалдырмады. Заман талабына сай үлгідегі көпірдің ұзындығы 72 метр, ені 3-метр.
Қала күніне орай ұйымдастырылған салтанатты шара барысында Жамбыл облысының әкімі Асқар Мырзахметовтың және қала тұрғындарының қатысуымен 3000-ға жуық ақ амур және карп секілді балықты суға жіберу рәсімі өтті. Сондай-ақ, жағалауда демалушылар тамашалайтын 5 дана аққу, 4 дана үйрек жіберілді.
Мұнан соң, аталмыш саябақта Жамбыл облысының әкімі Асқар Мырзахметов бастаған бір топ зиялы қауым өкілдері ағаш көшеттерін отырғызды.
Айта кетейік, жағалауда каналға шығатын 3 дана пирс, демалыс орындары, балалар ойын алаңдары,, спорттық снарядтар, суда жүруге арналған катамарандар қойылып, каналдың бойында ұзындығы 700 метрді құрайтын жаяу жүргіншілер жолы салынды.
