Шымкенттегі «Оңтүстік» индустриалды аймақта қолғап шығаратын зауыт іске қосылды. Елімізде тұңғыш рет іргетасы қаланған өндіріс орнын Кореялық инвесторлар ашып отыр. Жалпы жобаның құны 481 миллион теңгені құрайды. Аталған өнімге Қазақстанда сұраныс та жоғары. «Каз Хансоль Интерком ЛТД» деген атаумен жұмысқа кіріскен зауыт бейсенбі күні салтанатты түрде лентасы қиылды. Әзірге елімізде баламасы жоқ өндіріс ошағы Қазақстан мен Корея елдері арасындағы өзара ынтымақтастықтың арқасында іске қосылды деп айтуға болады. Сондай-ақ, шетелдік инвесторлар оңтүстіктегі бизнеске жасалған қолайлы жағдайларды біліп, өздерінің технологияларын жеткізіп мата қолғаптарын шығаруға кірісіп отыр.
Зауытта құрал-жабдықтардың барлығы автоматтандырылған. Қондырғылар ешқандай қолдың еңбегінсіз өнімді тоқып шығарады. Барлығы 160-қа жуық автоматты тоқу құралы жұмыс істеп тұр. Мысалы мұндағы бір тігін машинасы екі жарым минуттың ішінде бір қолғапты жасайды. Ал, күніне зауыт 30 мың жұп қолғап өндіреді. Тоқу цехында өнім 80 пайыз дайын күйге келсе, келесі цехта қалған жұмыстар атқарылады. Бұл жердегі шаруалар жұмысшылардың қол еңбегін қажет етеді. Өндіріс орнында жалпы 30-ға жуық адам еңбекпен қамтылған. Олардың көбі дәл осы цехта қызмет етеді. Қолғаптарға резеңке орнату мен артық тұстарын қырқу және оны дестелеп қораптарға салу сынды жұмыстарды жергілікті қыз-келіншектер атқаруда.Жалпы бұл өндіріс орны ОҚМУ-не де мол мүмкіндіктер беріп отыр. Оқу орнының жеңіл өнеркәсіп саласында білім алып жатқан студенттері зауытта тәжірибеден кейін жұмысқа орналасуына болады. Осы мақсатта келісімге келген тараптар әріптестікті қазірден бастап отыр. Жуырда университет ғалымдары мақта қалдықтарынан жіп жасау әдісін өндіріске енгізгелі отыр. Тың бастама шикізатқа кететін шығынды қысқартпақ. Өндіріс орнын салуға облыс әкімдігі қолдау көрсеткен. Жергілікті билік жер алу мен оған қажетті инфрақұрылымды тартуға көмек беріп отыр. Аталған жоба сәтімен іске асса, Кореялық инвесторлар оңтүстікте тоқыма өнімдерін шығаратын тағы қосымша өндіріс орындарын ашуды жоспарлауда.
Ерлан Отарбаев