Бүгін Оңтүстіктің 1022 мектебінде алғашқы қоңырау соғылып, 602 мыңнан астам оқушы жаңа оқу жылын бастады. 70448 бүлдіршін мектеп табалдырығын аттаса, 22 білім шаңырағының лентасы қиылып, пайдалануға берілді. Есесіне, апатты және үш ауысымды мектептердің мәселесі жыл сайын шешіліп келеді. Таңертеңмен алтын ұясына асыққан жандар бір-бірімен сағына қауышып, алғашқы сабақтарына кірісіп те кетті. Сыңғырлаған алғашқы коңырау Назарбаев зияткерлік мектебінің оқушылары үшін де соғылғанын айта кетейік. Оқу ордасына арнайы келген Облыс әкімі Бейбіт Атамқұлов дарынды жастардың білімі мен шығармашылығына шабыт тілей отырып, мерекелік құттықтауын жеткізді.
2014-2015 оқу жылында алғашқы қарлығаштарын жоғары оқу орнына шығарып салған химия-биология бағытындағы Назарбаев зияткерлік мектебінің атап айтар жетістігі мол. Үш тілде білім беретін оқу ордасы шәкірттеріне барлық мүмкіндікті қарастырған. Нәтижесінде халықаралық жарыстарда топ жарып жүрген мектеп мақтаныштары шетелдік оқу орындарының білім грантын жеңіп алған. Бітіруші 86 түлек медицина саласын таңдап, ел әлеуетінің дамуы жолында еңбек етпек. Түптеп келгенде, білімді жастар болашақ Қазақстанның еңсесінің нық болуында жұмыла жұмыс жасауға дайын.
Зияткерлік мектептің 129 түлегінің 128-і оқу гранттарына ие болса, облыстың өзге мектептерінің көрсеткіші де жоғары. Алтын белгі иегерлерінің республикадағы үлесі 30 пайызды құраған. Концерттік бағдарламадан кейін мектеп тынысымен танысқан Бейбіт Бәкірұлы зертханалық жұмыспен айналысатын шығармашылық топтың іскерлігіне куә болды. Әрбір сыныптан жиылған жұмыс иелері ғылымның дамуына өзіндік үлес қосуға талаптанып жүрген жастар. Әсіресе, физика-химия заңдылықтарын негізге ала отырып өндірісте пайдалануға болатын құрылғыларды ойлап тапқан.
Шәкіртпен бетпе-бет кездесіп, пікірлерін бөліскен Облыс әкімі Бейбіт Атамқұлов алғаш мектеп табалдырығын аттаған уақытын да еске алысты. Кеңес заманындағы білім алудың жағдайы бір бөлек десе, бүгінгі тәуелсіз мемлекетіміздің үлесіндегі оқушыға жасалынып отырған жағдай салыстыруға келмейтіндігін айтады. Шәкірттерден талап етілетіні – бар ынты-жігерімен білім жолындағы өз бағытын дұрыс пайдалану керектігін алға тартты. Өйткені, мамандық таңдау да жауапты іс. «Тәрбиесіз берілген білім – адамзаттың қас жауы» деп Әбу Насыр Әл — Фараби айтқандай, басты мақсат саналы ұрпақ тәрбиелеу. Сондықтан әкім Бейбіт Атамқұлов мектептерге ардагерлер кеңесінің мүшелерін, ақсақалдарды, зиялы қауым өкілдерін тәрбие сабақтарына қатыстыру мәселесін қозғады. Көнекөз қариялар арқылы үлкенді сыйлау, бір-біріне деген құрметті арттыруды көздесе, жасөспірімдердің салт-санасының қалыптасуы жолында жоғары буынның беделі мықты екендігін жасырмайды.
Өңірде биыл жалпы саны 104 білім нысанының құрылысы қолға алынып, жыл ағымында 49 мектепті іске қосу жоспарланған. Атқарылған жұмыстардың нәтижесінде 3 үш ауысымды, 27 апатты, 13 ыңғайластырылған ғимараттардың, 2 мектебі жоқ елдімекендердің мәселесі шешілмек.
Салтанат ТОЙБОЛОВА
