Сырлы өлеңнің падишасы Мұқағалидың туғанына — 90 жыл!

    «Қазақтың күпі киген қара өлеңін, шекпен жауып өзіне қайтарамын!». Осылайша қазақтың қара өлеңін — құдіретім деп жырлаған ақиық ақын Мұқағали Мақатаевтың туғанына биыл 90 жыл! Ол — қазақ жырының аспанындағы аз ғана жұлдыздардың бірегейі, қайталанбас сөз зергері . Жалындап өткен 45 жылдық қысқа ғұмырында қазақ әдебиетіне өшпес те, өлмес мұра қалдырған жан.    Өзінің көзі кетсе де, артында ізі кетпеген ақиық ақынның поэзиялық жыр толғаулары қазақ халқының жадында мәңгілік жаңғырып тұрары сөзсіз. Қара қаламмен сырлас болған ол өмірінде қиындықта демеу көрсеткендерді де, өзектен тепкендерді де, өсектегендерді де қара сөздің құдіретімен қара қылды қырыққа бөлді. Дәйім намыстың құлы, халықтың ұлы болды. Жалған дүниенің қатігездігін көп көрген сөз зергерінің бал-балалық бал дәурені зұлмат соғыспен қатарлас келген. Өмір қосын ерте тартып, тағдырдың талай тоқпағына ұшырағаны да жасырын емес. Өкініштісі, таланты таңдай қақтырып, мұзбалақ ақынның атағы Алатаудай асқақтап тұрған шағында 45 жасында кете барды.    Жырлары қиып түсер қылыштай өткір сөзді ақынды өскелең ұрпаққа өсиет етіп, рухани және патриоттық тәрбие беру мақсатында Александр Сергеевич Пушкин атындағы Түркістан облыстық әмбебап ғылыми-кітапханасында «Мен өмірді жырлау үшін келгенмін» атты әдеби кеші өтті. Іс-шараға қаламыздың жасампаз жастары атсалысып, ақынның белгілі өлең-жырларын көрермендерге тарту етті.

   Сөз жәдігерінің майталманы Мұқағалидың шығармашылығы өзіндік ерекшелігімен, тояттамас көңіл мен кәусар сезім сыйлайтын сергектігімен оқырман жүрегіне жол тартқан. Сырлы өлеңнің падишасы Мұқағали Мақатаевтың артында қалдырған мұрасы, маржан поэзиясы – мәңгілік ұрпақтың еншісінде.