Ауыл шаруашылығы өнімдерін дамытуға бағытталған семинар кеңес өтуде

«Бір алқаптан жылына 2-3 өнім алу – көкөніс шаруашылығын дамытудың негізі». Дәл осы тақырып аясында Келес ауданында облыстық семинар кеңес өтіп жатыр.

Семинар-кеңеске Түркістан облысы әкімі Ө.Шөкеев, Израиль – Қазақстан сауда-өнеркәсіп палатасының төрағасы Михаил Роэге, «Ел өнімі – Республикалық жобасының» Түркістан облысының жетекшісі Ақбаян Төлбасықызы, ғалымдар, аудан қала, ауыл округтері әкімдері, агроқұрылым басшылары мен кәсіпкерлер қатысуда.
Сондай – ақ ауыл шаруашылығы тауар өндірушілеріне тыңайтқыштар, гербицидтер және ауыл шаруашылығы техникаларын жеткізушілер өнімдері таныстырылды.
Түркістан облысының әкімдігі өңірдің табиғи-климаттық жағдайын, мүмкіндігін ескере отырып, 2019 жылы «Бір алқаптан жылына 2-3 өнім алу» жобасын қолға алған болатын.

Нәтижесінде, 3 млрд. теңгеге 107 жоба іске асып, жалпы құны 39 млрд. теңгені құрайтын ауыл шаруашылығы өнімдері өндіріліп қосымша 364 жұмыс орындары ашылған.
Тәжірибе көрсеткендей жобаның тиімділігі жылына 1 гектардан 6 — 7 млн теңгеге дейін табыс табуға болатындығын көрсетті, яғни 2- 2,5 есеге артық өнім алуға болады.
Ағымдағы жылы жобаны әрі қарай дамыту, кеңінен тарату мақсатымен әр ауылдық округте 10 жобадан іске асыру көзделіп отыр.
Бүгінгі күнге 127 ауылдық округ анықталып, 4 мың га аумақта 1390 жобаны іске асыру жұмыстары басталған.
Қазірдің өзінде 1,8 мың гектарға 634 шаруа қожалық бірінші өнімін алу үшін егіске кіріскен.

Бұл жобаның келешегі биік, маңызы зор, нағыз Түркістан облысына арналған жоба. Оның бірнеше себептері бар. Атап айтқанда:
— біріншіден, Түркістан облысы Республиканың оңтүстігінде орналасқан, басқа аймақтармен салыстырғанда күннің жылуы көп. Бұл кез-келген өнімді ерте мерзімде дайындап, тиімді бағамен өткізуге мүмкіндік береді.
Екіншіден, республикада 214 мың шаруа қожалық болса 71 мың агроқұрылым бізде тіркелген, яғни 33% құрап отыр. Оның ішінде 3 га дейін — 28 мың, 5 га дейін – 18 мың шаруа қожалық тіркелген, яғни облыс бойыншасаладағы үлестің 65%-ын ұсақ шаруа қожалықтар құрап отыр.
Әлемде ауыл шаруашылығы өнімін өндіруден және экспорттаудан үздік елдердің бірі — Израиль мемлекеті. Аумағы 21 мың шаршы шақырымды құрайтындығына қарамастан, жылына 1 млрд.АҚШ дол. құрайтын ауыл шаруашылығы өнімдерін өндіреді. Экспорт көлемі 500 млн. АҚШ доллардан асады.
Бұл жерде 2 га жері бар агроқұрылым, ірі шаруашылық болып саналады.
Сондықтан ұсақ, майда шаруа қожалықты кемшілігіміз емес, артықшылығымыз деп бағалап, ауыл тұрғындарының жағдайын жақсарту, ауыл шаруашылығы өндірісін еселеп арттыру мақсатында озық технологияларды өндіріске ендіру, оның ішінде «Ауыл шаруашылығы дақылдарынан жылына 2-3 өнім алу» жобасын қолға алу семинар-кеңесте ұсынылды.
Сондай-ақ, семинар-кеңесте «Ел өнімі – Республикалық жобасы» бағдарламасы аясында көп балалы, аз қамтамасыз етілген отбасыларды қолдау мақсатында «Үйіргелік жерлерді игеру» жобасы таныстырылды.
Ағымдағы жылы Түркістан облысында ауыл шаруашылығы дақылдары 825,0 мың га орналастырылатын болады.
Бүгінгі күнге жер айдау жұмыстары мен техникалар дайындығы 96 % орындалды.
Бүгінгі күнге 5,1 мың га көкөніс, 1,0 мың га арпа, 0,5 мың га жоңышқа,1,0 мың га қартоп егілді. 157,0 мың га егілген күздік астықтың жағдайы жақсы. Үстеп қоректендіру жұмыстары басталды.
Көктемгі дала жұмыстарын атқаруға 37,0 мың тонна жанар-жағар май бөлініп отыр. Оның ішінде 10,0 мың тоннасын алғаш рет ақпан айынан бастап тарату шешілді. Бағасы да тиімді, литріне шаққанда 175 теңгеден босатылады. Жеткізіп берумен 177,0 теңге. Бұл нарықтағы бағадан 15 теңгеге арзан.
Барлық тыңайтқыштар, гербицидтердің түрлерінің 50 пайызын субсидиялауды басталды. Бұған биыл алғаш рет пестицидтер, инсектицидтер де қосылып отыр. Тыңайтқыштар мен пестицидтердің 50 пайызын субсидиялауға облыстық бюджеттен 4,0 млд. теңге жуық қаржы бөлінді.
Жаңбырлатып, тамшылатып суғару технологиясын ендіру шығына төленетін субсия көлемін 175,0 мың теңгеден 400,0 мың теңге дейін ұлғайтуды көздеп отыр.