Шымкентте балаларға арналған қала әкімінің шыршасы өтті. Мерекеге ата-анасының қамқорлығынсыз қалған және әлеуметтік тұрмысы төмен, көп балалы отбасының балалары қатысты. Сондай-ақ, білім мен өнер, спорт салаларында жетістіктерден көрініп жүрген бір топ бүлдіршіндер жаңа жылдық қойылымдар көрсетіп, көпшілікті өнерлерімен тәнті етті. Жиынға арнайы келген Шымкент қаласының әкімі Ерлан Айтаханов алдағы жаңа жыл мерекесімен құттықтады.
Мерекелік жиынға қала әкімінен бөлек Шымкент қаласы мәслихатының хатшысы Ғани Ташқараев, қалалық ардагерлер кеңесінің төрағасы Исамуддин Рысбаев қатысты. Қала әкімінің шыршасына қатысқан барлығы 250 оқушыға 100 мың теңге көлемінде қаржылай сыйлықтар табысталды.
Жыл сайын жаңа жақсылықтары мен қуаныштарын ала келетін жаңа жыл мерекесін балалар керемет көңіл күймен қарсы алды. Ән де айтты, би де биледі. Мерекеге арнайы қойылымдар да көрсетті. Түрлі-түсті киімдері көздің жауын алып, жан баласына мерекенің жақындап қалғандығын ұғындыратындай. Қазақи нақыштағы ертегі кейіпкерлерінің кереметтей көріністері тіпті тамаша. Әсем безендірілген ортадағы шырша да жаңа жылдың символы ретінде көрікті ерекше ашып тұр.
