Бүгін, 6 тамыз күні ҚР Индустрия жəне инфрақұрылымдық даму вице-министрі Қайырбек Өскенбаевтың төрағалық етуімен Арыс қаласының кəсіпкерлері мен облыстық кəсіпкерлер палатасы, несиелік қаржы ұйымдарының басшыларының қатысуымен жиын өтті. Жиынның басты мақсаты — апаттан зардап шеккен Арыс қаласындағы кəсіпкерлік нысандарын қалпына келтіру жəне олардың шығындарын өтеу бойынша атқарылып жатқан жұмыстарды талқылау.
Облыстық кəсіпкерлер палатасының мəліметі бойынша, Арыста 404 кəсіпкерлік обьектілері болса, апат кезінде соның 7-і толықтай зардап шеккен. Ал заңды түрде тіркеуде тұрған обьектілер саны 353-ті құрап отыр. Бүгінге дейін нақ осы тіркеуде тұрған кəсіпкерлік обьектілері арасынан 71 нысан қаржыландырылған. Оның жалпы мөлшері 352 млн тенгені құрайды. Ал, толықтай зардап шеккен 7 кəсіпкерлік обьектісі қайта қалпына келтіріліп жатыр. Бүгінге дейін 4 кəсіпкер шағын несиеге қол жеткізген. Бұл туралы Түркістан облыстық кəсіпкерлер палатасы директорының орынбасары Жомарт Махмұт мəлімдеді.
Өз кезегінде жергілікті кəсіпкерлер көкейтесті сауалдарын қойып, жұмыстарын қайта жүргізу үшін шығындарын өтеп беруді сұрап жатты. Бұл тұрғыда вице-министр Қайырбек Өскенбаев құжаттары дайын кəсіпкерлердің өтемақыларын тезірек өтеу жəне кəсіпкерлерге дəл қазір аса қажет болып тұрған 1 пайыздық несиелеу бағытын тиімді қарастыру жөнінен нақты тапсырмалар жүктеді. Ал мəселелерді тиімді шешу үшін министрлік өкілі жергілікті кəсіпкерлермен екі күнде бір рет бас қосып, берілген тапсырмалардың орындалуын жіті қадағалап отыратынын жеткізді.
«Айғақ-Ақпарат»
