«Айғақ» арнасы да көне шаһардың қысын көрді. Қар жауа бермейтін облыстың ауа райы бізді ақ жауынымен қарсы алды. «Алланың нұры жауды» дейтін ата-бабамыз. Диқаншылықты басты кесіп еткен өңірдің халқы жауын жауса қуанады. Себебі егін мол болады деген сөз. Самарқандта тұратын қазақтардың саны біршама. Көрші ағайындылардың еліне келгенімізді естіп, түбіміз бабамыздан тоғысатын қандастарымыз қонаққа шақырды.
Өкреш ата ауылына ат басын бұрдық. Жолай келе жатып ауылдардың тыныс-тіршілігін сырттан бақылап келдік. Бос жатқан жерді аңғармадық. Қолынан кетпені мен күрегі түспейтін халық егіс егудің басын бастап кетіпті. Тақта-тақтаға бөлінген егістік алқабы көз тартарлық. Қарасаң, көзің тояды. Елде көшетті егетіндерді көп көрсек те, сол көшетті дəннен өсіретіндерді байқамайсың. Алма, алмұрт, шие дейсің бе, түр-түрін егіп тастапты. Қаз-қатар тізіліп өсіп келеді. Біз іздеп келген ауыл Самарқанд қаласынан 40 шақырымда орналасқан. Көріністерді тамашалап келе жатып, ойдым-ойдым ауыл жолдадына келгенде ой бөлінді. Жүргізуші ауыл жолдары осылай болады деді. Осы ретте, біздің мемлекеттегі тас төселген тізу жолдар көз алдымыздан бір сəт жүріп өтті. Өкреш ата ауылына да кіріп келдік. Өкреш ата ХІV — XV ғасырда өмір сүрген. Сол заманда хан деңгейіне көтерілмесе де, ел бірлігін сақтауда маңызды қызмет атқарыпты. Яғни, «Өкреш» деген «ханзада» деген мағынаны білдіреді екен. Бүгінгі таңда мұнда 500- ге жуық Өкреш атаның ұрпақтары өмір сүруде. Сонау заманнан ала шапандылардың арасында өмір сүріп келе жатқандықтан болар, əбден туыстас елге сіңісіп кетіпті. Қашан да қабірін қадірлеп, баба рухына құран бағыштап отыратын қазақтың салты бұл қыстақта да жақсы сақталған. «Өлі разы болмай, тірі байымайды». Алдымен бейіт басында құран сүрелері түсірілді.
Өкреш ата ауылының тіршілігі қайнап тұр. Қариялары елдің қазынасына айналған. Ерлері кең пейілді көңілдерін көрсетті.
Ақ дастархан жайылды. Екі елдің достығы мен туыстығының нығаюын бата берген ақсақалдар тілегіне қосты. «Айғақ» газетін ұсынып, қариялар Қазақстандағы жаңалықтармен танысты. Біз келген елге сəлемін жолдады.
Айтолқын Молдабекова
