Бүгін Оңтүстік Қазақстан облысының әкімдігінде облыс әкімінің бірінші орынбасары Д.Сатыбалды мен ҚР Ұлттық экономика вице-министрі Қ.Өскенбаевтың қатысуымен жиын өтті. Кездесу барысында Қазақстанда «Doing Business» субұлттық рейтингі жобасын іске қосудың таныстырылымы өтті. Жиынға Әлемдік Банктің сарапшылары мен Ұлттық экономика, энергетика, әділет министрліктері, Астана мен Алматы, сонымен қатар, Ақтөбе, Қарағанды, Шығыс Қазақстан, Павлодар және Қостанай облысы әкімдіктерінің қызметкерлері де қатысты. Аталған субұлттық рейтинг 8 өңірдің облыс орталықтарында «Құрылысқа рұқсатнама алу», «Электрмен жабдықтау жүйесіне қосылу», «Кәсіпорын ашу» және «Меншікті тіркеу» индикаторлары негізінде жүргізіледі. Жобаның негізгі мақсаты облыстарда бизнесті жүргізудің жеңілдігі тұрғысынан өңір рейтингін анықтау болып табылады. Рейтингтің Қазақстанда жүзеге асырылуы республиканың жекелеген аймақтарында бизнесті басқару мен оны бақылау арқылы кәсіпкерлікті реттеуге көмек береді. Сонымен қатар, аталған жоба Қазақстандағы қалалар арасында бәсекенің дамуына септігін тигізіп, тәжірибеден сәтті өткен реформалардың кең таралуына ықпал етеді. Бүгінгі таңда еліміз «Doing Business» ғаламдық рейтингінде 189 елдің арасында 41-орында тұр. Бір жылдың ішінде Қазақстан «Кәсіпорынды тіркеу» (53-орыннан 21-орынға көтерілді), «Құрылысқа рұқсатнама алу» (100-орыннан 92-орынға шықты), «Меншікті тіркеу» (25-орыннан 19-орынға көтерілді), «Несие алу» (71-орыннан 70-орынға), «Келісімшартты орындауды қамтамасыз ету» (14-орыннан 9-орынға шықты) және «Төлеуге қабілетсіздік рұқсатнамасы» (79-орыннан 63-орынға көтерілді) өлшемдері бойынша көрсеткіштерді жақсартты. Сонымен қатар, бүгінгі таңда Оңтүстік Қазақстан облысындағы Кәсіпкерлерге қызмет көрсету орталығы базасында қызметтерді алуды жеңілдетудің жүйелі жұмыстары жүргізілуде. Аталған орталықтарда 2015 жылы 35 899 кәсіпкерге кеңестер беріліп, оқытылып, бизнес жоспарларды әзірлеу мен рұқсатнама құжаттарын рәсімдеуде қолдау алған. КҚКО көмегімен рұқсатнама құжаттарын алу мерзімі айтарлықтай қысқарды. Мәселен, құрылысқа рұқсат алу 151 күннен 36 күнге дейін, газды тұтынудың техникалық шартын алу мен электрмен жабдықтау желісіне қосылу кезеңі 90 және 30 күннен 7 күнге қысқарды. Субұлттық рейтингтің Қазақстанға енгізілуі елімізде бизнес-климатты жақсартуда Үкіметтің жүйелі жұмысының жалғасы болып табылады. Жиын соңында Қайырбек Үсенбаев «Doing Business» рейтингіне жауапты сегіз облыстың әкімдіктері мен мемлекеттік органдарына жобаны жүзеге асыруды қамтамасыз ету аясында бірқатар тапсырмалар жүктеді.
