ЗЕРДЕЛІ ҰРПАҚТЫҢ ЗИЯТКЕРЛІК ОРДАСЫ

Заманында сөз қадірін білген жұрт кітапты қазынаға балаған. Бүгінде сол үрдістің үзілмеуіне, жас өреннің зердесі толысып, парасатының артуына Мемлекет басшысының өзі басымдық берген. Осы мақсатта үшінші мегаполисте «Кітап түні» фестивалі өтті.

«Кітап түні» фестивалі Мемлекет басшысының бастамасымен қолға алынған «КітапTime» жобасы аясында жүзеге асты. Бұл жоба туралы әлеуметтік желі арқылы хабардар болып, өз ықыласымен келіп, тұрақты қатысып жүргендер көп. Солардың бірі – Жансая Аманбекқызы. Қатысушының сөзінше, ол бұған дейін тоғыз талқылауға қатысып, басқосуларда қаламгерлердің құнды туындыларын ерекше форматта талқылаған.

Сөз зергерлерінің мұрасын ұлықтаған басқосуда Төлеген Айбергенов пен Фариза Оңғарсынованың шығармашылығы таразыланды. Қаламгерлердің жырларындағы туған жер, махаббат пен ана тақырыбының көркемдік өрнегі талқыға түсті. Жиынға 10 кітап клубының өкілдері, ақын-жазушылар, зиялы қауым өкілдері мен жас өрендер қатысты.

Жобаға ұйытқы болған «Серпіліс» қоғамдық қоры жетекшісінің айтуынша, бұл басқосу сөз қадірін ұғынған жандардың жүздесетін ордасына айналған. Маусым айында бастау алған жобаға әуелде екі жүзге жуық адам қатысқан. Ал бүгінгі талқылауға елуге тарта оқырман жиналған. Осы уақыт аралығында он бір кітаптың мазмұны таразыланып, тағылымы талқыға түскен. Ұйымдастырушының сөзінше, «Кітап түні» фестивалі аяқталғанымен, «КітапTime» жобасы аясындағы кездесулер алдағы уақытта да жалғасын таппақ.

Айта кетейік, кеш барысында қазақ ән өнерінің таңдаулы туындылары әуелеп, кітап клубтарының жұмысына үзбей атсалысқан он белсенді мүшеге ақшалай сыйлықтар табысталмақ.