БОЗКІЛЕМДЕГІ БОЛАШАҚ ЧЕМПИОНДАР

Күшке — айла, екпінге — есеп қарсы! Мегаполисте ересектер мен жасөспірімдер арасында джиу-джитсудан қалалық чемпионат өтті. Жапонның «жұмсақ өнері» атанған бұл сайыста қара күштен гөрі ақыл-айла мен ептілікке басымдық беріледі. Ал кімнің айласы асып, кімнің әдісі үстем түсетінін бозкілемдегі белдесу шешеді.

Джиу-джитсудан қалалық чемпионаттың шымылдығы салтанатты түрде ашылды. Дүбірлі додаға әр өңірдің федерация басшылары жиналып, қолдау білдірді. Жарысқа Шымкенттің 150-ге жуық кіл мықтысы қатысып, бозкілемде белдесті. Ал бәйгенің басты мақсаты – Қазақстан чемпионатына үздіктерді іріктеу.
Дәстүрлі додаға төрт жылдан бері қатысып келе жатқан Мұқағали Сұлтанбек биыл финалға жолдама алған. Жас спортшының айтуынша, джиу-джитсу күш-қайратпен қатар, интеллектуалдық ойлауды да қажет етеді. Осы уақыт аралығында ол бірқатар жетістікке жетіп, өз шеберлігін шыңдағанын атап өтті.

Шымкентте джиу-джитсуға ден қойған жастардың қатары артып келеді. Федерация президенті Бекзат Оспанұлының айтуынша, жастардың бұл спорт түріне ынта-ықыласы ерекше. Осыған орай, шаһарда бразилиялық джиу-джитсу академиясын ашу жоспарда бар. Қалай десек те, бұл спорт түрінен байрақты бәсекелерде топ жарып, мерейі үстем болған спортшылар да аз емес.
Дәстүрге айналған қалалық чемпионат – әр спортшының үмітін үкілеп, үлкен жеңіске жол ашатын белес. Бозкілемге шыққан әр балуанның көздегені – жеңіс, ал арманы – ел намысын абыроймен қорғау.