АЛАЯҚТАРҒА ҚАРСЫ ЖАСАНДЫ ИНТЕЛЛЕКТ

Енді көпе-көрнеу жасалатын алаяқтық схемалардың жолы кесіледі. Өйткені шымкенттік жастар жасанды интеллекттің көмегімен өзгенің атын жамылып жарнама жасаушы парақшалар мен зиянды сайттарды анықтайтын жоба жасауда. Айта кетейік, бұл – қаладағы кезекті хакатон сайысына қатысушылардың еңбегі.

Жыл басынан бері бесінші рет хакатон ұйымдастырылып отыр. Әр сайыс қоғамдағы өзекті әрі азаматтардың осал тұстарын көрсететін мәселелер төңірегін қамтиды. Мұндағы жастар бір оқпен екі қоян атты деуге негіз бар. Бірінші кезекте қаржылай сыйақыны иемдене алса, екінші жағынан, өзгелерден озық шыққан азаматтар Экономикалық тергеп-тексеру департаментіне жұмысқа орналасу мүмкіндігіне ие болады.

Сайыс негізінен үш бағытты қамтиды. Қатысушылар өздері таңдаған кейс бойынша жасанды интеллект пен деректерді талдау технологияларын пайдаланып, цифрлық қауіпсіздікті нығайтуға бағытталған прототиптер әзірлейді. Дайын жобалар сарапшылар алдында қорғалып, нақты талаптар бойынша бағаланады. Қатысушылар сынға түскенімен, бәрінің негізгі мақсаты бір. Ол – интернеттегі алаяқтықтың алдын алып, азаматтардың қауіпсіздігін қамтамасыз ету. Жастардың арасында жақындары алаяқтардың құрбаны болғандықтан, бұл мәселеге бейжай қарай алмайтындар да бар.

Хакатонның жалпы жүлде қоры – 1 миллион теңге. Үздік жобалар қаржылай марапатталып қана қоймай, тәжірибеде қолдануға мүмкіндік алады. Ұйымдастырушылар мұндай бастамалар алдағы уақытта да жалғасын тауып, жас мамандардың тың идеялары цифрлық қауіпсіздікті қамтамасыз етуге үлес қосады деп сенеді.