Қай тілде білім алсаң, сол ұлтқа қызмет етесің. Бүгінде баланың тәрбиесі мен танымына цифрлық контенттің әсері зор. Алайда экраннан үздіксіз көрінетін анимациялар мен шетелдік мультфильмдердің бала дамуына ықпалы да жиі талқыланады. Осы мәселелерді ортаға салған тіл жанашырлары, дөңгелек үстелде тоқайласты.
Қазақ тілін цифрлық кеңістікте дамыту бүгінгі күннің басты міндеттерінің бірі. Себебі баланың тілі мен дүниетанымына әсер ететін контенттің сапасы маңызды. Осы бағытта Сақ киностудиясы балаларға арналған жаңа мультсериалдар әзірлеп, ұлттық құндылықтар мен қазақ тілін анимация арқылы насихаттауға ден қойып отыр.
Қазақ тілін үйренуге мүмкіндік беретін цифрлық жобалар да аз емес. Соның бірі Сөйле апп қосымшасы. Жобаның авторы Сәуле Ғалымжанқызы бұл платформаны қазақ тілін үйренгісі келетін кез келген адамға қолжетімді етуге бағыттаған. Тіпті шетел азаматтары да қосымшаға тіркеліп, мемлекеттік тілді меңгере алады.
