Шымкентте діни ахуалды тұрақты сақтау бағытындағы жұмыстардың нәтижесі талқыланды. Қалада бүгінде 104 мешіт бар. Алғаш рет барлық мешіттің діни ахуалы арнайы сараланып, деңгейлер бойынша бағаланған. Сонымен қатар, теріс діни ағым ықпалында болған 1400 азаматпен жүргізілген жұмыстардың нәтижесі жарияланды. Бұл туралы қалалық қоғамдық кеңестің кезекті отырысында айтылды. Қала әкімдігінің мәжіліс залында өткен отырысты Қоғамдық кеңестің төрағасы Бұхарбай Парманов жүргізді. Күн тәртібіне үш мәселе енгізілген. Алғашқы мәселе бойынша Тұран ауданының әкімі 2026 жылдың жеті айында атқарылған жұмыстарды баяндады. Биыл ауданның әлеуметтік-экономикалық дамуына 7 миллиард 803 миллион теңге қаржы қаралған. Бөлінген бюджет есебінен инженерлік инфрақұрылым жаңартылып, бүгінде ауданға қарасты 22 шағын аудан 100 пайыз сапалы ауыз сумен және электр энергиясымен қамтамасыз етілген. Есеп барысында кеңес мүшелері тұрғындар көтеріп жүрген нақты мәселелерге де тоқталды. Соның бірі – Айкөл шағын ауданындағы 62 оқушының мектепке тасымалдануы. Қазіргі таңда балалардың қауіпсіз әрі тұрақты қатынауын қамтамасыз ету мәселесі өзекті болып отыр. Қоғамдық кеңес бұл бағытта жауапты мекемелерге нақты ұсыныстар беріп, мәселені бақылауда ұстайтындарын жеткізді.
Үшінші мәселе бойынша Шымкент қаласы Дін істері басқармасы басшысының орынбасары Ғалымжан Сарманов діни ахуалдың алты айлық қорытындысын ұсынды. Бүгінде қалада 104 мешіт жұмыс істейді. Оның ішінде 25 мешіт қызыл деңгейге, 42 мешіт сары деңгейге жатқызылған, ал қалғандары жасыл деңгейде. Сонымен қатар теріс діни ағым ықпалындағы 1400 азаматпен жүйелі түсіндіру жұмыстары жүргізіліп, оның нәтижесінде 100 адам дәстүрлі діни ұстанымға бет бұрғаны айтылды. Қоғамдық кеңестің басты мақсаты – мемлекеттік органдар жұмысының ашықтығын қамтамасыз етіп, қала тұрғындарының өзекті мәселелерін қоғамдық бақылау арқылы шешуге ықпал ету. Отырыста көтерілген ұсыныстар хаттамаға енгізіліп, жауапты мекемелерге нақты тапсырмалар жүктелді.
